Hammers-in Soucek la dawn

West Ham chuan Czech Republic midfielder Tomas Soucek chu Slavia Prague aṭangin an lalut dawn a, a man atan pound maktaduai 13-in inremna an nei. 

Hammers manager David Moyes chuan Soucek hian medical a neih mek thu a sawi a, he thu ziak i chhiar meuh chuan an inlalut fel tawh hial ang. 

Moyes chuan, "Ka player duh ang tak a ni," tiin a midfielder thar tur chungchang hi a sawi a, kum 24 mi lek nichunga ram tana vawi 25 inlan tawh a nih avangin a chhiat a rinawm loh. 

Soucek hian Slavia tan tun season-ah inelna hrang hrangah match 19 a khel a, goal 10 a khungsak. Hammers fan-ten goal keng tel turah an beisei ang. 

December 30-a Manuel Pellegrini thlaka Hammers enkawltu Moyes chuan player dang pawh lakluh tuma club dawr an neih mek thu a sawi a, player hming erawh a tarlang lo. 

Hetihlai hian Hammers hian 2018/19 season-a an sum hman dan an ti chhuak a, pound maktaduai 27.26 an hloh thu an sawi - Hammers hian tun hnai kum li chhungin transfer-ah ringawt pound maktaduai 214.4 an seng. 

West Ham hi Premier League-ah 17-na an ni mek a, 18-na Bournemouth leh 19-na Watford te nen point 23 ṭheuh an nei - Hammers chuan suma an tlakchhiat loh nan relegate loh chu an club tana tih makmawh a nih thu an sawi.