Anfield-ah City-in Liverpool an sawp

Season ṭantira Premier League nomawi inchuh tura rin hlawh ber chu champion lai Liverpool leh Manchester City an ni a, mahse, February thla kan kai meuh chuan club pahnih inthlauhna hi point 10-a ni tawh. 

Pathianni zan Premier League inkhel hmuhnawmah City chuan 4-1 in Liverpool an sawp a, anmahni hnaih bertu Manchester United aia an sanna pawh point nga lai a ni tawh - match khatin an khel tlem zui.

 

City tan Ilkay Gundogan chuan penalty khung lo mah se a hnuah goal hnih a khung a, Raheem Sterling leh Phil Foden-ten goal khat ve ve an khung bawk. Liverpool tana Mohamed Salah goal khat khung chu mualpho zualpui khuhna chauh a ni. 

Liverpool hi top four-ah la inhamtang mah se anni aia match hniha khel tlem Everton leh Aston Villa-ten an khelh hmabakah point ruk an hlawh theih chuan an la tlanpel thei a, season ṭantira champion sawi ri team tan top four pawh a chiang ta meuh lo!

Anfield-a inkhelah team pahnih hi goal khung tumin an innawr nghal a, inkhel hmuhnawm min chhawpsak. Liverpool tan Sadio Mane chuan hnai set sawt aṭanga a tauh over bakah Roberto Firmino shot ṭha tak chu Ederson chuan ṭha zetin a dang bawk. 

City hun a her chhuak a, tlarhnung laia ding Fabinho chuan Sterling lakah penalty a chawi. Penalty pet turin Gundogan a lo pen chhuak a, a pet over luah!

Mual sir lamah thinrim takin Pep Guardiola a lo ang a, hei hian Spanish manager tana Anfield-a chak a pawimawhzia a pholang - khualmuala Reds a hmachhawnin Pep hi a la chak ngai lo a, chak ngei a duh.

Goal lut loin chawlhlawk an hmang a, second half-ah erawh Pep-a hmelah hlim hmel hmuh tur a awm ta. Zan duhawm lo hmangtu Liverpool goalkeeper Alisson chuan Foden-a shot chu a dang per thei hram a, a per lehlam changtu Gundogan chuan goal-ah a chantir. 

Zan lungngaihthlak

Minute 63-naah Liverpool beiseina siam turin Salah chuan penalty a hlawh chhuak a, Egyptian forward hian harsa lo takin goal-ah a chantir - inkhel hmuhnawm kan en zel dawn niin a lang.

Mahse, City an khel ṭha tulh tulh a, Liverpool an talbuai tulh tulh thung. Alisson-a chesual a, vawi hnih ngawt ball a petchhuah ṭhat tawk loh avangin City hian Gundogan leh Sterling hmangin goal an rawn khung chhunzawm. 

Alisson hian minute 73-naa ball petchhuah a tumna lamah Foden a pass a, English midfielder hian Gundogan tan awlsam taka khung turin a siamsak. 

Minute li hnuah Alisson bawk chesualin Bernardo Silva-a pass thung a, Portuguese midfielder hian ṭha zeta Brazilian keeper pet khumin Sterling chuan goal line aṭangin a lo tauh lut - minute 83-naah khel ṭha em em mai Foden-a hun a her chhuak a, sawisel rual loha goal ṭha hmangin an chak a nemnghet. 

League match 68 zet tlawm loa an lo khelh tawhna Anfield-ah league match thum chu a zawnin Liverpool an tlawm ta a, Jurgen Klopp-a enkawl team hian inben harh an mamawh takzet tih a chiang - City pawhin kum 2003 hnua Anfield-a an chak hmasak ber an tawng. 

Liverpool tan tlarhma nawr nana an hman tel ṭhin full back Andy Robertson leh Trent Alexander-Arnold-ten tun season-ah beisei an phak lo a, Virgil van Dijk leh Joe Gomez awm loh avangin zalen taka tlarhma pui turin an ngaih a ngam tawk lo niin a lang. 

Thiago Alcantara thiamzia hi kan hriat hnu ni mah se Premier League-ah beisei a la phak lo tih hi hnial rual a ni lo a, player inhliam an ngah bawk si avangin Klopp-a'n a mitthla ang takin Spanish midfielder hi a la hmang thiam thei lo niin a lang. 

Liverpool tan hliam ngah hi chhuanlam atana hman reng erawh a thiang lo a, midfielder thiam bik  Kevin de Bruyne leh striker goal khung thiam  Sergio Aguero-te chu City hian an chhawr thei bik lo.

Top four hi kan tum ber chu a ni tawh a, theihtawp kan chhuah zel ang. A sang pali zinga tel turin match khelh tur kan la ngah tawk a, a pawimawh ber erawh hnehna chan a ni - zaninah erawh kan chak lo phawt!

First half kha chu inkhel hmuhnawm tak a ni a, team pahnihin goal khung kan tum ve ve. Mahse, second half-ah an kalphung an rawn thlak a, keini midfield-ah kan che tam tawk si lo a ni. 

Goal kan khung kha chuan kan dinhmun kan siamṭha ṭan a, mahse, Alisson khan tihsual lian tak pahnih rawn neiin Foden-a rawn che ṭha em em bawk. 

Kan match hnuhnung ber ngaihtuahin kan rilruah nghawng a neih ngei chu a rinawm a, mahse, ka player-te kha an inringtawk hle. Kan khelh dan khan minti lawm a, 4-1 a kan tlawm hi sawifiah thiam harsa ka ti. 

Goal kan chhuah hnua kan khelh chhunzawm dan leh kan theihna kan pholan khan danglamna a thlen a ni. Kum tam tak chhung chu Anfield-ah kan chak thei lo a, tunah chuan kan ti ta. Engtikah emaw chuan fans awm ngeiin he hmunah hian kan chak theih ka beisei tlat a ni. 

Hnehna pawimawh tak a ni a, mahse, February chauh a la ni. Ni e, pangana pawh kan tlansan thui ta a, season thara Champions League khelh pawh a pawimawh em em - tun ang huna a zawna match 10 chak theih erawh chhuan loh chi a ni lo.