FA Cup-ah Man United Vs West Ham

Zanin aṭangin FA Cup last 16 khelh ṭan a ni dawn a, zanin dar 1:00 hian Old Trafford-ah Manchester United leh West Ham United te an inkhel dawn. Hemi hma darkar hnihah Burnley leh Bournemouth te an inhmachhawn bawk ang.

FA Cup-ah hian Premier League team ṭha Manchester City, Chelsea, Tottenham, Leicester City leh Everton te an la dam a, champion lai Arsenal leh Liverpool te an tla tawh. Jurgen Klopp-a hote hi Man United-in an hnawt chhuak.

Ole Gunnar Solskjaer-a hote hian nikum December khan West Ham hi 3-1 in an hneh. Hemi ṭuma goal hmasa ber khungtu Paul Pogba hi inhliam vangin a dinhmun a chiang lo. FA Cup a nih avangin Solskjaer-a'n keeper David de Gea aiin Dean Henderson a thlang ang a, player dang erawh hriatthiam a har. Man United hian Pathianni zanah league match an neih leh chauh avangin Norwegian manager-in team ṭha a luhtir pawhin a mak lo ang.

Chutihrualin Man United ṭantuten an player thar Amad Diallo an hmu châk tawh khawp ang. Ivorian winger Amad hi Under 23 tan vawi hnih a inlan tawh a, Liverpool U23 an hneh ṭumin goal hnih a khungin Blackburn Rovers U23 an hneh ṭumah goal khat leh assist vawi thum a nei a ni.

Hammers erawh Man United an hmachhawn dawn avangin loan hmanga an hawh Jesse Lingard an chhawr thei dawn lo. Fulham an hneh ṭuma hnawhchhuah Tomas Soucek pawh tuna a lan dan chuan hrem tur a ni a, chutihrualin an khinletna a  hlawhtlin chuan chhawr theih a ni dawn.

Manchester United-a Sir Alex Ferguson thlaktu David Moyes hian inelna lian thamah a club enkawl a la champion pui lo a, Ole Gunnar Solskjaer-a'n inchhuanna tur a nei bik lo. Norwegian manager Ole hian nikum khan Man United hi inelna pathumah ngawt semifinal luhpui mah se pakhatahmah final a thleng lo.