AFC hmaah Trau

Zanin dar 7:00 hian Kalyani Stadium-ah Aizawl FC leh Manipur club Trau te an inkhel dawn. I League khelh mekah table mawngphaha awm Indian Arrows an nem deuh a, club dang zawng erawh an intluk tawk avangin tun ṭuma NorthEast Derby khelh tur pawh hi a pawimawh hle.

Aizawl FC hian January 30 khan Manipur club pakhat zawk Neroca 2-1 in an hneh a, tun ṭuma Trau an hneh leh theih chuan Championship Stage khel turin an dinhmun a ṭha sawt a ang. Kumin I League-ah hian vawi khat ṭheuh inkhelh kual zawhah a sang parukin champion tur an zawng dawn a, a hniam pangain relegate tur an zawng thung ang.

Mizo club hian Nigerian forward Princewill Emeka Olariache an chhuah a, defender Richard Kassaga a la inhliam bawk avangin Mizo player-te an pawimawh dawn. Coach Yan Law-a'n thuneihna a chelh ṭantirh aṭangin team ṭhat theih dan ber tur zawngin player a enchhin a, match hnih a enkawl tawhah inkhel bul ṭantu an dang zel.

Chutihrualin coach Law hnuaiah keeper Lalmuansanga, defender PC Laldinpuia, midfielder Alfred leh R. Malsawmtluanga bakah goal nawr turin Brandon VL Remdika leh MC Malsawmzuala ten hmuh pawimawh an chang a, Trau nen pawh an pawimawh an chang chhunzawm a rinawm.