Australian Open an khel ṭan Thiem leh Serena tan hna a awlsam

Nimin zing aṭang khan tennis inelna ngaihhlut Australian Open chu khelh ṭan a ni a, a hmunah entu an awm thei. Champion tura rinkai, season hmasa finalist Dominic Thiem leh hmeichhe player langsar ber Serena Williams te chuan hnehna an chang.

Angelique Kerber erawh a chak lo, 2016 champion hi seeded 23-na pek a ni. Chak tura rinkai ni mah se American nula Bernarda Pera lakah 6-0, 6-4 in a chak lo. Kerber hi hrileng kaihhnawihah khan mahni 'room' a khunghran player 72 zingah a tel a ni.

Season hmasa final-a a chak lohna Rod Laver Arena-ah Thiem a kir a, darkar hnih leh minute 40 chhungin Mikhail Kukushkin chu 7-6(2), 6-2, 6-3 in a hneh - winners vawi 29 a vaw chhuak a, a tihsual vanga a khingpuiin point 27 a hmuh erawh a tih tlem a ngai dawn.

Austrian tlangval hian a match lehpekah chuan Hugo Dellien leh Dominik Koepfer inkhel a chak zawk a hmachhawn leh dawn. Hard court a nih avangin Thiem service a na tawk viau a, tihsual neih tlem chu hmasawn a ngaihna langsar a ni.

Kum 27 mi Thiem chuan, "Kukushkin khan tawnhriat a nei ṭha, he hmunah hian 2012 khan fourth round a lo thleng tawh. A inkhelh thiamna a nih avangin hmachhawn a harsa viau. Set hmasa berah ka tawlhthlu deuh a, a hnulama ka tho chhuak thei kha a lawmawm," a ti.

American star Serena hi kum 39 mi ni tawh mah se 'Serena' kha a la ni reng. Minute 56 chhung lekin a khingpui Laura Siegemund chu 6-1, 6-1 in a sawp. Serena hian winners vawi 16 a vuak chhuah laiin a khingpui erawhin vawi li bak a nei lo.

Nimin inkhelah Serena hian bul a ṭan fuh tawk lo, a service hmasa aṭangin double fault a nei nghal. Game hmasa ber hloh mah se hnunglam erawh a hawi nawn tawh lo, a service ṭha leh ball vuak na hmanga inkhel thunun chungin a chak tlang.

Grand Slam vawi 23 champion tawh Serena hian Margaret Court (24 titles) nihrual a tum mek, kuminah hian kawng zawh tur hautak tak nei mah se a khel ṭha tluang a nih erawh chuan champion tura rinkai a ni.

US Open champion Naomi Osaka pawhin harsatna a tawk lo. Japanese nula hian world number 13 hlui Anastasia Pavlyuchenkova chu 6-1, 6-2 in a hneh a, a vawi hnih nan Australian Open title a beisei leh dawn.

Season hmasa khan Western and Southern Open bakah US Open-ah Osaka hian hnehna a chang, tunah hian match 14 chhung tlawm nei loin a kaltluang mek. Osaka chuan, "Tun hma lama ka inkhelh tawhna ni mah se kumin chu a boruak a danglam," a ti.

Inkhel dangah French Open champion Iga Swiatek chuan Arantxa Rus lakah 6-1, 6-3 in hnehna a chang. Kum 40 mi Venus Williams pawhin Kirsten Flipkens 7-5, 6-2 a hnehin second round a inhlangkai ve bawk.

Tennis season khat chhunga Grand Slam hmasa ber Australian Open hi tun kar leh kar leh chhunga khelh a ni dawn. Inelna neihna hmun Melbourne Park awmna state thuneituten ni khatah entu 25,000-30,000 awm an phal.

Tennis court hrang hrangah inelna an nei a, stadium pakhatah fans an pungkhawm tam thei lo thung - stadium lutte erawhin hmaituamna (mask) an vuah kher a ngai lo, zalen leh engthawl takin inkhel an en thei tihna a ni.

Inkhelah hian line judge dah an ni lo. Line endiktu atan hian 'ball-tracking camera' hman a ni. Endikna khawl hian ball chu line pawnah nge line chhungah a kal tih chiang takin a lo en vek a, rang takin umpire hnenah a hrilh.

Tournament khel tur player zawng zawng pawh hi ni 14 chhung khung hran vek an ni a, hei vang hian coronavirus lakah pawh buaina an tawk lo tura beisei a ni.