Super Bowl vawi 55 Brady telna bawk an champion

Tom Brady kaihhruainain Tampa Bay Buccaneers-in Super Bowl vawi 55-naah Kansas City Chiefs 31-9 in an hneh. Kum 43 leh ni 188 mi Brady hian Super Bowl nomawi vawi sarih a chawi a, a vawi nga nan Super Bowl MVP-ah thlan a ni bawk.

Brady hian kum 20 chhung New England Patriots tan khelin vawi nga Super Bowl a lakpui a, kum 40 pelh tawh hnuah chawl mai loin Buccaneers a pana record a siam. Tampa Bay Buccaneers hi mahni muala Super Bowl khel hmasa ber an ni a, an champion zui bawk. 

Brady chuan, "Head coach Bruce Arians-a'n kan chungah rinna a nghat a, a hunah tak kan che ṭha bawk," tiin Super Bowl la thei coach upa ber Bruce Arians (kum 68 leh ni 127) a fak.

Tom Brady hming ṭhat theih nan Bruce Arians-a'n team a rem ṭha a, final-ah team ṭha zawka ngaih Kansas City Chiefs an hneh theihna chhan bulpui pawh an tlarhnung player-te an ni.

Chiefs chhuanvawr quarterback Patrick Mahomes leh hote an chelh thei a, Arians-a thluak ṭhatzia a lang.

Chutihrualin khawvelin mi bik Tom Brady an ngaihven zui a, chhuizui tlak record a nei ve reng reng bawk. Brady hi NFL history-a Super Bowl la hnem ber a ni a, a club hlui New

England Patriots (5) leh Pittsburgh Steelers te pawhin a tluk lo. Patriots hian Brady an dahsanzia lantirin, "Engtik hunlai pawha ṭha ber," tiin an club official twitter-ah an ziak hial.

Raymond James Stadium-ah entu 25,000 chauh en phal a ni a, Covid-19 chu ni lo se entu leng zat 65,890 an khat ṭhap ang. Chutihrualin Brady-a thil ropui tih lai hi khawvelin TV leh

Website kaltlangin an thlir a, nomawi chawi zawha, "Ka rawn kir leh ang," tia a sawi chuan American football ngainatute a ti lawm khawp ang.

Brady hian club pahnih Super Bowl a chawipui a, quaterback zingah Peyton Manning nen chiah vawi hnih champion thei an awm. Kum 2020 khan Brady-a'n Patriots a chhuahsan a, nakumah 'blazer' nen Super Bowl ka en dawn lo a ti a, number 12 chuanna jersey nen Super Bowl vawi 55-naah a team a champion pui a ni.