Halep a chak awlsam: Semifinal-ah Halep Vs Muguruza

Simona Halep chuan minute 53 chhung lekin Anett Kontaveit a hneh a, Australian Open hmeichhe semifinal a lut. Romanian nula Halep hi vawiin chawhma dar 10:00 hian Grabine Muguruza nen an inhmachhawn ang.

Muguruza hian semifinal-ah Anastasia Pavlyuchenkova chu 7-5, 6-3 in a hneh. Spanish tennis star Muguruza hian  French Open leh Wimbledon-ah nomawi chawi tawh mah se hard court-ah a theihna tak a lantir lo - tun ṭum hi Australian Open chauh ni loin hard court-a khelh grand slam-a a thlen san ber a ni.

Kum 28 mi tawnhriat nei ṭha Halep-in Grand Slam quarterfinal vawi khat luhna Kontaveit chungah zahngaihna a lantir lo a, a zawn zatin game 11 lak ṭum a nei hial.

Halep chuan, "Court chhungah inrintawkna ka nei a, ka ke a chak ṭha a, ka khingpui khelhpui dan tur ka hrechiang bawk. Point zawng zawngah ka theihtawp ka chhuah vek," tiin inkhelh banah a sawi. Romanian nula hian kumin Australian Open-ah set a la hloh lo.

Grabine Muguruza hian nikum Australian Open leh French Open-ah fourth round a thleng a, Grand Slam dang pahnihah first round-ah ve ve a tla.

Season liam taa a chet ṭhat miau loh avangin Muguruza hi tun ṭumah pawh hian seeded a ni lo a, chutihrualin Grand Slam vawi hnih champion tawh a nih miau avangin theihna a la nei reng. Spanish nula hian  seeded number 30-na Anastasia Pavlyuchenkova chu 7-5, 6-3 in a hneh.

Semifinal-a inhmachhawn tur Halep leh Muguruza te hi world number 1 hlui ve ve an ni a, Grand Slam vawi hnih ve ve champion tawh an ni.

Kum 2018 khan French Open-ah Halep han Muguruza hi a hneh a, an pahnih inkhelhna hrim hrimah erawh Spanish nula Muguruza hian 3-2 in hma a hruai mek.