Pathian vang liau liauin kan champion - Mizoram manager

Mizoramin a lungthu kim nan Dr TAo Football-ah champion nomawi an chawi a, NorthEast-a football thiam ber state tia chhal theih an ni leh ta. Manager T. Vanlalhluna chuan Mizoram champion theihna chhan chu Pathian vang liau liau a nih thu a sawi.

January 28, Thawhlehni zan khan Kohima-ah Mizoramin nomawi chawi turin final-ah Sikkim chu 1-0 in an hneh a, goal awm chhun khungtu David Lalrinmuana chu man of the final-ah an thlang. 

Mizoram hian nimin tlai khan Nagaland an chhuahsan a, zanin dar 8:00 hian Mizoram Football Association buatsaihin Vairengteah hmuah an ni ang.

Mizoram coach R. Lalremtluanga chuan, "Team ṭha tak kan ni tih kan pawm a, tun hnai Mizoram team-ah chuan squad ṭhat ber ṭum pawh a ni hial ang. Hun pui Krismas leh kumthar kan hmang zo chiah a, training kan ṭan a, ni sarih lek chhungin inelna hmachhawn turin an inpeih. Team official chuan kan tih tur kan ti mai a, hna tak tak thawktu chu player an ni a, an zarah kan mawi a ni," tiin a player-te a fak.

Dinthar FC leh Chhinga Veng FC pawh lo enkawl tawh Remtluanga hian National Junior Football Championship (BC Roy Trophy)-ah kum 2018 khan Mizoram a champion pui a. Nikum kum tawp khan Santosh Trophy qualifier-ah Mizoram senior team a vawi khat nan kaihruaiin final round a thlenpui a, inelna pangngai a hmachhawn hmasak berah nomawi a chawi nghal.

Remtluanga chuan, "Sikkim kan hneh loh khan team kan siksawi a, chutih rualin chak tur zawkah kan la inngai tho. Kan vanduai kan tih rualin kan tan chuan result ṭha zawkah ka ngai a, kan chak loh avang khan kan khelh hmabakah pawh kan fimkhur sawt. Inelna neih chhung hian kan ṭawngṭai nasa a, Pathian malsawmna kan dawng," tiin Vanglaini a hrilh a, MFA chungah lawmthu a sawi tel bawk.

Mizoram football-a tawnhriat nei ṭha ber zinga mi, Dinthar Veng pa T. Vanlalhluna chuan, "Ṭha inti takin Nagaland kan thleng a, amaherawhchu kan beisei aiin kan khingpuite an ṭha. Dr T Ao Football-ah sum fai a tam avangin Nagaland, Meghalaya, Sikkim-te chuan inpuahchahna an nei ṭha a, awlsam tura kan ngaih kha a awlsam ta lo. Pathian vang liau liauin kan champion," tiin a lawm thu a sawi.

Hluna hian MPL hmasa berah Dinthar FC a champion pui a, Mizoram senior team hi inelna pasariha a champion puina chiah niin Dr T Ao Football-ah vawi hnih nomawi a chawina a ni bawk.

Mizoram manager chuan, "Nagaland-in min thleng ṭha a, an hotel ṭha berah min dah. Practice kan duh pawhin veivahna tur bus leh driver min pe a, kan duhna hmunah, kan duh hun takah kan kal thei zel. Lawmna tur hlir a ni," tiin a thlengtu Nagaland a fak.

Mizoram hi kum 2011 khan Gangtok-ah Dr T Ao Football-ah hian a vawi khat nan an champion a, kum 2014-a nomawi an chawi nen tun hi vawi thum a ni. Heng champion team pathumah hian F. Lalrinpuia (Valpuia) a tel vek.

Republic Veng tlangval Valpuia hian amah ang bawka tawnhriat nei ṭha dang man of the final David-a, best forward Malsawmfela, R. Malsawmtluanga, Lalrinchhana Tochawng, Lalbiakhlua leh MS Dawngliana te nen vawi tam Mizoram an tihmingṭha tawh.

Chutih rualin chanchin lawmawm erawh player thar an chhuak ve zel a, best player-a thlan Lalchungnunga hi kum 19 mi lek a ni a; PC Laldinpuia, Vanlalzuidika, Vanlalthanga, Lalsawmzela, Lalruatfela, Vanlalnghenga, Lalmuansanga, RS Lallawmzuala, Vanlalthlamuana leh Lalnunmawia ten Mizoram tihmingṭha zel turin theihna an nei tih a lang.