Boruak ṭha Arsenal hmaah Newcastle

Nipui bazarah an duh leh mamawh an lakluh theih avangin Arsenal boruak ṭhat vanglai a ni a, an hlimna hi khelmual chhungah an chhawm zel thei dawn em tih chu fiahin a awm chhunzawm nghal dawn.

Pathianni zan dar 6:30 hian St. James' Park-ah Newcastle United hmachawn turin Gunners an lenglut dawn. Unai Emery naute hian season thara an Premier League match hmasa berah chak an tum ang.

Unai Emery-a'n season hmasa aṭangin Arsenal a enkawl a, a league match hmasa pahnihah champion lai Manchester City leh Chelsea a hmachhawn zawn - fixture hautak tak hi paltlang zo loin khelh hnihah point an hmu lo.

Kumina an bul ṭanna tur Newcastle hi Rafael Benitez-a'n a chhuahsan hlim an ni, fans lamin an ui ngawih ngawih chungin Spanish manager hi a contract a zawh avangin a chhuak. Benitez thlaktu Steve Bruce hnuaia indin thar tur an ni a, team pahnih tan chak a pawimawh ang.

Newcastle manager Bruce chuan, "Premier League team ṭha kan nih tawh ṭhinna kha lan chhuahtir leh kan tum dawn, fans lamin khelmual chhunga ka naute chetla hmuh nuam an tih ngei ka beisei. Club chanchin hi inchhuang taka an sawi theihna turin hna thawh ka tum.

"Tun ṭuma kan mikhual tur Arsenal hi team ṭha an ni a, tihsual kan neih a thiang lo ang," a ti. English manager hian team lian lakah chuan goal khung aia a venhim lam an ngaih pawimawh tur thu a sawi bawk.

Arsenal chief executive Ivan Gazidis-a'n 2018 September thla khan AC Milan a pan a, North London club hian nikum tir lama an lakluh Raul Sanllehi chu Head of Football atan an kaisantir - Spanish football administrator kaihhruaina hnuaia nipui bazar an hman hmasak berah Gunners fans an lungawi.

Media lamin bazar nan pound maktaduai 45 bawr chauh nei nia an sawi club hian - Nicolas Pepe (£72m); Gabriel Martinelli (£6m); Dani Ceballos (Loan); William Saliba (£27m); David Luiz (£8m) leh Kieran Tierney (£25m) te an lalut. 

Arsenal-in player an chhawr mumal tawh loh tur an chhuahtir nual thung a, an hmanral aṭanga hralhna zat paih leh chuan pound maktaduai 45 bawr vel chauh an hmang. Barcelona aṭanga London pantu Sanllehi-a'n a thluak a vawrh vir hneh hle tih a chiang.

Defender Luiz leh Tierney te hi Ningani zana lakluh chauh an nih avangin Newcastle lakah chhawr theih an la nih a rinawm loh a, winger Pepe pawh pre season-ah a inlan loh avangin minute 90 a khelh a la rinawm loh bawk.

Real Madrid aṭanga an hawh midfielder Ceballos erawh season thar inbuatsaihna lamah a hmel hmuh tur a awm hman, Spain international hian Magpies lakah inkhel bul a ṭan lo a nih pawhin khelmualah a luh ngei a rinawm.

Newcastle pawhin bazar tawp niah Andy Carroll chu kum riat zet club danga a chhuah hnuah an lalet a, tun hma lama an hman thiam tawh sa hi fans lamin a inkhel hmu chak viau mah se inkhel nghal tur chuan a tan a la hma mah mahin a rinawm.