Police leh Chanmari chak chungin an tla Semifinal-ah AFC leh Electric Veng

NEXA Independence Day Celebration Football Tournament-ah Group of Death tiha vuah group A-a team pali Aizawl FC, Electric Veng, Mizoram Police leh Chanmari ten point li vek an hmu a, goal difference nei ṭha I League club AFC leh Lalsangzuala Hmar kaihhruai Electric Veng ten semifinal an lut.

Nimin inkhelah Mizoram Police-in Electric Veng lehthalin 2-1 in hnehna an chang a, Aizawl FC-in Chanmari FC an hneh chuan Police-in semifinal an lut thei dawn.

Amaherawhchu, Chanmari FC-in I League club 3-1 in an sawp ta zawk a, Electric Vengin semifinal an lut. Chanmari goal khat khung pawm loh chu pawm ni se Electric Veng hi an tla tur an ni a, 5-1 in chak phei se chuan Aizawl FC chu tla tur an ni thung. Mahse engkim a fel hnua tla ta chu MFA Super Cup finalist Police leh Chanmari te an ni.

Electric Vengin bul an ṭan ṭha a, ball pet thiam Jacob Lalrawngbawla freekick ṭha zet hmangin minute 20-naah Police lakah hma an hruai nghal. 

Electric Vengin Mizoram Police hneh tawh tura an inngaih hnuah keeper Lalrinnunga a chefuh tawk lo. Police striker F. Lalrinpuia chuan a hun takah a awmna turah tak a awm avangin minute 80-naah siphurh a sut a, minute thum hnuah Lalrinzuala Khiangte cross ball chu keeper Nunga'n man sualin goal-ah a lut.

Lalsangzuala Hmar hote an ngui a, hnehna chang zawk Police pawh an match hmasa bera Aizawl FC laka 5-1 zeta an chak loh avangin an hlim bik lo. Chutihrualin I League club-in Chanmari an hneh chuan Police-in head to head hmangin semifinal an lut dawn.

Aizawl FC-in minute 10 leka Joe Zoherliana goal hmangin goal an khung nghal a, hetah chiah hian I League club leh Police chu semifinal lut tur an ni.

Amaherawhchu, Lalnunzama goal hmangin Chanmari FC lamin beiseina thar siamin minute 30 a tling chuan Abel Lalruatfela leh Lalmuankima Hauhnar ten an khung belh leh bawk. Police beiseina a chau a, Electric Veng dinhmun a derthawng bawk. Chanmariin semifinal lut turin goal khat dang an mamawh a, minute 10 pawh awm tawh loah K. Roluahpuia goal hmangin semifinal lut turah inngai hman mah se assistant referee-in kut a hmangah ngaiin flag a phar a, goal-ah pawm a ni lo.

Standly Rozario hote goal thum zet chhuahin an mualpho a, amaherawhchu Police an sawp zarah group A aṭangin pakhatna an ni ta tho. Electric Veng pawh Police laka an chak loh avangin inchhuang thei an ni lo a, assistant referee thutlukna avangin semifinal an lut hram. Inkhelh banah K. Mama'n a kut ni loin a dul hmanga a tihluh thu a sawi a, goal luh lai hian a bula AFC defender-te'n an sawi buai loh avangin S. Malsawmtluanga hote an vanduai takzet.