Quarterfinal-ah Halep

Simona Halep chuan Svetlana Kuznetsova chu straight set a hnehin Rogers Cup quarterfinal a lut a, Wimbledon champion hian grass court hnua inelna a hmachhawn lehna hmasa berah a khelh dan phung a man leh nghal thu a sawi.

Toronto-ah Romanian nula hi seeded pangana pek a ni, Ningani zan inkhelah darkar khat leh minute sarih chhungin 6-2, 6-1 in hnehna a chang; a match lehpekah chuan Marie Bouzkova a hmachhawn ang. World number 4 hian a match hmasa zawkah Jennifer Brady chu darkar hnih leh a chanve zet hnuah a hneh hram, a match hnihnaah erawh talbuai lai nei miah loin a kaltlang thei a ni.

Kum 27 mi Halep chuan, "Ka khingpui chu an danglam tawh ngei a, chutihrual chuan ka khelh danah hma ka sawn hle tih ka sawi thei. Match tin mai hi a awlsam lo tih chu ka hria, amaherawhchu Wimbledon ang khan ka khelh ṭhat leh theih ka beisei," a ti.

Inkhel dangah seeded pathumna Karolina Pliskova chuan Estonia nula Anett Kontaveit chu 6-3, 7-5 in a hneh a, ani hian quarterfinal-ah Bianca Andreescu a hmachawn ve leh thung ang. Elina Svitolina leh Sofia Kenin te pawh an tlang zel.

Grand Slam vawi 23 champion Serena Williams leh Naomi Osaka te pawhin an khingpui hnehin last 16 an paltlang a, season hmasa US Open final-a inkhelte hi tukin hian an inhmachhawn zui leh nghal.