Nipui transfer bazar

Khawvela league ngaihven hlawh ber tih ngam Premier League nipui transfer bazar a tawp ta a, club 20-in sum an sen zat belhkhawm chu pound tluklehdingawn 1.41 a tling. 

Ningani zan dar 9:30-ah English club te bazar theih hun a tawp a, transfer tawp nia transfer awm zat chu 17 a ni - Premier League club ten transfer tawp ni bika sum an sen zat chu pound maktaduai 170 a tling bawk. 

Manchester United aṭanga pound maktaduai 74-a Inter Milan pantu Romelu Lukaku chu transfer tawp nia player manto ber a ni a, Premier League khel tur zingah chuan Everton-in Arsenal aṭanga pound maktaduai 34-a Alex Iwobi an lakluh chu manto ber a ni. 

Arsenal chu nipui transfer-a sum hmang hnem ber niin pound maktaduai 155 an seng a, transfer tawp niah pawh pound maktaduai 33 an la seng tling. 

Transfer tawp nia player langsar zingah Arsenal-in pound maktaduai riata Chelsea centre back David Luiz leh pound maktaduai 25 man Celtic left back Kieran Tierney an lakluh chu a tel. 

Mipui ngaihven Paulo Dybala lakluh an tumnaah Tottenham Hotspur hlawhchham mah se Real Betis midfielder Giovani lo Celso chu loan-in an la thei a, Fulham winger Ryan Sessegnon chu pound maktaduai 25-in an lalut bawk. 

Chelsea midfielder Danny Drinkwater chuan loan-in Burnley a pan a, Manchester City-in Derby County goalkeeper Scott Carson loan-in an hawh a, Newcastle United-a Andy Carroll kir pawh langsar zingah a tel. 

Leicester City-in pound maktaduai 18-in Sampdoria attacking midfielder Dennis Praet an lalut a, Watford-in an player manto ber ni turin Rennes winger Ismaila Sarr chu pound maktaduai 25-in an lei bawk. 

Ningani zana Premier League transfer tawp rual hian a hnuai chiah division Championship pawh a tawp ve nghal a, League one leh League Two bakah Europe-a league lian dangte chuan September 2 thleng player an la lalut thei ang. 

Nipui transfer-a Premier League club ten player an lei zawng zawng zat hi 102 a tling a, nipui transfer-a player lei zat hi a zawnin kum ruk chu a tlahniam tawh. Premier League club 20 zinga 11 chuan tun nipui transfer-ah khan club record siamin player an lalut a, English top flight football kai thar Sheffield United chuan vawi li ngawt record an siam hman. 

Arsenal, Aston Villa, Leicester (vawi hnih), Manchester City, Newcastle, Southampton, Tottenham, Watford, West Ham leh Wolves te chu club record-a player lalut dang an ni. 

Manchester United-in Leicester City aṭanga pound maktaduai 80-a Harry Maguire an lei chu player manto ber a ni a, Arsenal-in pound maktaduai 72-a  Lille winger Nicolas Pepe an lei chu a dawttu a ni. 

Manchester City-in Atletico Madrid midfielder Rodri (£62.8m) leh Juventus right back Joao Cancelo (£60m) an lakluh pawh player manto zingah an tel pha a, Tottenham chuan an player manto ber ni turin Lyon midfielder Tanguy Ndombele chu pound maktaduai 53.8-in an la bawk. 

United right-back Aaron Wan-Bissaka (£50m, Crystal Palace), West Ham striker Sebastien Haller (£45m, Eintracht Frankfurt), Newcastle striker Joelinton (£40m, Hoffenheim),  Leicester midfielder Youri Tielemans (£40m, Monaco) te chu player manto zual zingah an tel. 

Chelsea chu hrem ni mah se season khat loan-a an lo kawl tawh avangin midfielder Mateo Kovacic chu a nghetin an lalut thei a, pound maktaduai 40 an inseng. Real Madrid-a pound maktaduai 89-a an kaltir Eden Hazard chu khawvel transfer lian pawl a ni a, a man hi pound maktaduai 150 thlenga sang chho thei tur a ni. 

Player langsar che tam lo mah se player man a san chak avangin tun nipui transfer sum sen a tam a, kum 2003-a transfer window mumal taka kalpui a nih hnuah Premier League club ten player lei nana sum an sen hnem ber dawt a ni. 

Kumina £1.41bn an sen hian kum 2017-a pound tluklehdingawn 1.43 sen chiah a phak lo. Mahse, Premier League club-te sum sen zat hi player hralhna aṭanga an sum lakluh paih hnuah chuan pound maktaduai 625 chauh a tling. 

Hetihlai hian European top flight dangah transfer bazar khar a la nih loh avangin thil thleng thei tam tak a la awm. Spurs playmaker Christian Eriksen chu English football chhuahsan tura sawi rik a la ni reng a, United midfielder Paul Pogba a la awm bawk. 

Manchester City winger Leroy Sane erawh a hliam a nat avangin Bayern Munich lam a pan a rinawm ta chiah lo.