FIFA-in AIFF a chhan - Engtin nge ni dawn?

Football khawvela thuneitu sang ber FIFA chuan I League club Minerva Punjab hnenah lehkha a thawn a, "Indian football ṭhatna turin AIFF lo thawhpui zel turin kan ngen che u a ni," an ti!

Mahse, Minerva neitu Ranjit Bajaj chuan lehkha hi a tak tak a ni leh nih loh an hriat loh thu a sawi a, Ranjit chuan, "Midang min thawn chhawn aṭanga dawng mai kan ni a, direct-in min la thawn ve lo," a ti a, lehkha erawh a thawn let. 

Minerva Punjab neitupa hian lehkha a thawn letah hian FIFA chu Indian court leh infiamna khawvela thuneitu sang ber Court of Arbitration for Sport (CAS)-a kalah a vau zui. 

I League club paruk Minerva, East Bengal, Mohun Bagan, Aizawl FC, Gokulam Kerala leh Churchill Brothers chu AIFF-in top league-a Indian Super League thlan a tum avangin an lungawi lo a, FIFA-ah an zualko. 

FIFA chuan thla hmasa khan AIFF hnenah lehkha a thawn nghal a, he lehkhaah hian FIFA chief member associations officer Joyce Cook chuan AIFF dinna an hriat duh thu leh, FIFA roadmap an zawm leh zawm loh chungchang hriat an duh thu a ziak tel. 

Mahse, tun hnaiah  FIFA acting deputy secretary general (Football) Mattias Grafstrom lehkha nia lang chu Minerva hian an dawng a, tunah erawh AIFF a rawn chhan leh lawi si!

FIFA chuan, "Indian football-in hma a sawn theihna tur chuan club-ten AIFF-in thawhpui ṭhat a ngai a, invaia inlungrualna chu hmasawnna atana thil pawimawh tak a ni," an ti. 

Mahse, Ranjit Bajaj chuan FIFA hi lehkha thawn ve lehnghalin, "I League club-te hian a ṭul a nih chuan dan hmanga hma la turin India court kan pan dawn a, CAS thleng pawhin kan pan mai ang," a ti a, FIFA a vau. Hriat tel atana ṭha erawh tarlan angin FIFA lehkha hi Minerva-in 'direct' in an dawng lo a, a tak ngei a ni em, tih chu buaina ni tel thei a ni. 

Hetiang boruak karah hian Kolkata club, thawm na tak pahnih East Bengal leh Mohun Bagan an ngawi rih tlat a, hei hian mak tih a hlawh hle. 

Quess East Bengal FC chairman Ajit Isaac chuan, "Engmah sawi tur ka nei lo," tiin he thil thleng chungchang hi a sawi a, Mohun Bagan senior official Debashish Dutta chuan, "Lehkha kan dawng ve lo," tiin a ngawi rih bawk. 

Kolkata club pahnih hian season tharah ISL an zawm dawn niin media ṭhenkhat chuan an tarlang leh tawh a, hei vanga ngawi leh ta an nih pawhin a mak lo.