MFA-in hremna tichhuak

MFA Disciplinary Committee chuan CYMA Football, MFA Super Cup leh I Day Football-a player leh coach cheimawi lo bakah hremna a tichhuak.

a) Armed Veng South Branch YMA coach C. Lalbiaksanga chu July 8, 2019-a Salem Branch nen an inkhelh ṭuma inkhelh zawha referee chungah kut a thawh avangin kum 2019 chhungin MFA hnuaia program/tournament engah mah tel thei lo tura hrem a ni.

b) Armed Veng South Branch YMA player Lalruatkima chu July 8, 2019-a Salem Branch inkhelh ṭuma inkhelh zawh veleh referee ṭawng mawi lo taka a ṭawng khum avangin warning pek tur a ni a, hetiang thil a thleng leh a nih chuan a chungah hremna lekkawh a ni ang.

c) Bawngkawn Branch YMA player MC Malsawmzuala chu Round of 16-a BVT Branch YMA nen an inkhelh ṭumin Red Card pek a ni a, chhuak mai lo a BVT player PC Laldinpuia a hnek avangin he thu rel hun aṭanga MFA buatsaih match hmasa ber khel thei lo tura hrem a ni.

Chanmari player H Lalmuankima chu MFA Super Cup semifinal-a Electric Veng an hmachhawn ṭumin red card a hmuh hnuah Electric Veng ṭantute lakah a chet mawi loh avangin match khat khel thei lo tura hrem a ni.

Chanmari FC player Lalremruata chu August 4, 2019-a Electric Veng FC nen an inkhelh ṭum red card pek a nih hnuah assistant referee hnek a tum vang te, technical area chhuahsan duh loa bench-ah a hun tawp thleng a ṭhut lui avang leh referee room kawta assistant referee chang lehin insual puiah a sawm avangin match thum khel thei lo tura hrem a ni.

Sialhawk khua Crespo Vanlalhriatpuia (Khatla Venga cheng) chuan MFA dan kalhin club pathum Chawnpui FC (MPL), 1st Bat. MAP Academy (ADFA 1st Division) leh Khatla Football Club (ADFA 3rd Division) ah te a inziah luh avangin MFA Transfer window hawn leh hma loh chuan MFA/DFA/Zone hnuaiah registration ti thei lo tura hrem a ni.