Pathianni zanah Solsjkaer Vs Lampard

Premier League kar hmasa berah Pathianni zan dar 9:00-a Manchester United leh Chelsea inkhel tur en a châkawm ber a, Old Trafford-ah club ṭantute ngainat Ole Gunnar Solskjaer leh Frank Lampard ten season bul an ṭan dawn.

Manchester United hian transfer tawp niah player la lo mah se transfer hawn ṭantirha an duh ber defender Harry Maguire an lalut tih theihngilh loh a ṭha. Solskjaer hian tlarhnung thuam ṭhat chu hna hmasaah a nei a, keeper ṭha David de Gea a chelh bakah chhawr nghal theih tur right back Aaron Wan-Bissaka an la bawk.

United tlarhnungah Maguire leh Sweden rinrawl Victor Lindelof te an inkawp dawn a, mual sira manto pahnih Wan-Bissaka leh Luke Shaw te an awm bawk avangin kum hmasa lam nen chuan hmasawnna awm tura ngaih a ni.

Solskjaer hian Paul Pogba aṭanga team a din tur thu a sawi lawk tawh a, French midfielder hi Real Madrid-in sum ṭhahnem tak nen an hel chungin an la chelh zel. Tlarhmaah Anthony Martial, Marcus Rashford bakah rawlthar Mason Greenwood an awm. Alexis Sanchez erawh training a zawm tlai avangin Chelsea lakah an chhawr a rinawm lo.

United hian Ander Herrera leh Romelu Lukaku thlakna tur an lak loh avangin champion tura rinkai an ni phak lo a, chutihrualin kum hmasa lama an lak Fred leh Alexis ten an man phu tawka an khelh chhoh chuan mipui thlirna a dang thei ang.

Nimin tlai press conference-ah Ole Gunnar Solskjaer chuan, "Club chhehvel boruak a ṭha lo tih kan hre ve lo. Kan inringtawk hle," tiin a sawi a, United hian pre season friendly match vawi ruk an khelhah an chak vek avangin beiseina sang tak nena a thlir hi a mak lo.

Transfer chungchang sawi zuiin Solskjaer chuan, "Pawisa hman tur chu a awm mah se vawi leh khata sum hman vak erawh kan tum lo. Kan duh tak player an man phu ngeia lak kan duh," tiin a sawi a, league dang transfer tawp hmaa player ṭhenkhat an chhuah theih thu a sawi rualin Maguire chu chhawr nghal theih a nih tur thu a sawi.

Solskjaer hian United a enkawl hnuah amah chher liantu Sir Alex Ferguson-a hnung zuiin academy naupang a hmang nasa a, kum 17 mi Mason Greenwood pawhin hmun pawimawh a chang dawn. Norwegian manager chuan, "Mason hi a khel dawn a, kan hmu ngun dawn. Goal pawh a khung ngei ang," tiin a sawi.

Goal khungtu lam sawiin Solskjaer chuan, "Romelu Lukaku hian record ṭha tak a nei a, target man kan duh a nih chuan a ṭha ber zinga mi a ni. Kei chuan ka player neih te hi ka ringtawk - Marcus leh Anthony ten goal an khung dawn. Daniel James pawhin chance a rawn siam ang. Jesse Lingard pawh goal tam zawk a khung ngei ka ring. Tun season chu nawr dan chi hrang hrang kan ngah dawn," tiin sawi. 

Chelsea manager thar Frank Lampard hmabak a hautak nghal dawn, an hmelma Manchester United khelmual Old Trafford-a an khelh dawn bakah player pawimawh inhliam an tam. Season liam ta league match 36 zeta inlan David Luiz leh veteran defender Gary Cahill an chhuah bakah hliam vangin Antonio Rudiger, Reece James, Ruben Loftus-Cheek leh Callum Hudson-Odoi te a chhawr thei dawn lo.

Blues-in Real Madrid pan ta Eden Hazard leh inhliam player-te tel loin fiahna an hmachhawn ṭan dawn mah se Lampard-a team hi zuam tur an la ni lo. Chelsea hian keeper ṭha Kepa Arrizabalaga an nei a, tlarhnung laia hman tur Andreas Christensen leh Kurt Zouma te hian theihna sang tak neiin mual sirah Cesar Azpilicueta, Emerson Palmieri leh Marcos Alonso te chhawr theihin an awm.

Midfield-ah N’Golo Kante aia ṭha bik an awm lo a, Jorginho thiam zia hmuhin a awm tawh. Goal nawr turin Mateo Kovacic, Christian Pulisic leh Pedro te an awm a, Mason Mount leh Ross Barkley te rintlak danin team dinhmun a nghawng ang. Goal khung turin France champion puitu Olivier Giroud bakah hmabak nei êng Tammy Abraham leh Michy Batshuayi te an la awm cheu bawk.