Nadal-a'n kawng dik a la zawh zel

Rafael Nadal chuan Rogers Cup nomawi a kawl lai humhim turin kawngdik a zawh zel a, nimin zing khan Guido Pella hnehin quarterfinal a inhlangkai. Dominic Thiem leh Alexander Zverev te pawhin an khingpui an hneh ve bawk.

Montreal-ah thli a thaw nasa a, inkhel boruak pawh a danglam phah deuh. Tawnhriat ngah Nadal a talbuai phah lo, Grand Slam vawi 18 champion tawh hian 6-3, 6-4 in hnehna a chang a, semifinal lut turin Italian tlangval Fabio Fognini a paltlang leh a ngai ang.

Nadal-a'n ATP Masters 1000 bikah vawi 379 hnehna a chang tling ta chiah a, Roger Federer nen record inṭawm a neih chu khumin Grand Slam dawta inelna ngaihhlutah hian hnehna chang hnem ber a ni ta. Kum 33 mi Nadal hian Masters 1000 title pawh 34 zet a la tawh. Nadal chuan, "Thli thaw lo hnuaia inkhelh chu duhthusam a ni. Mahse, indoor-ah ni loin out door-ah kan inkhel a, hetiang thli thaw hi chu a ken tel ve reng a ni," tiin a sawi.

Inkhel dangah seeded pasarihna Fognini chuan Adrian Mannarino 6-2, 7-5 in a lo hneh a, a vawi 16 nan Nadal nen an inhmachhawn leh ang. An intawn tawhnaah Nadal hi vawi 11 zet a chak. Seeded pahnihna leh champion tura rinkai ni bawk Dominic Thiem chuan US Open champion hlui Marin Cilic 7-6 (9-7), 6-4 in a hneh. Austrian tlangval hian quarterfinal-ah chuan Daniil Medvedev a hmachhawn ve leh thung ang.

Last 16 inkhel dangah 2017 champion Alexander Zverev chuan Nikoloz Basilashvili 7-5, 5-7, 7-6 (7-5) in a hneh a, a hma a ding leh tur chu Russian player Karen Khachanov a ni. Quarterfinal match dangah Gael Monfils leh Roberto Bautista Agut te an inhmachhawn ve thung bawk dawn a ni.