Madrid derby danglamna Benzema

Inrinni zan Madrid derby inkhelah Karim Benzema chuan goal awmchhun a khung a, an mikhual Atletico Madrid lakah Real Madrid chu 1-0 in hnehna a chanpui.

Real-in hnehna an chan leh tak avangin Spanish La Liga table chung berah an awm chhunzawm zel dawn tihna a ni a, nizana inkhel Barcelona-in hnehna chang pawh ni se Real dinhmun a danglam phah lo ang. 

Atletico erawh an tlawm leh tak avangin top four huang pawn lamah an awm chhunzawm zel a, hmahruaitu Real an thlauhna ringawt pawh point 13 ngawt a ni ta. 

Hetihlai hian Champions League khelh tum Valencia chuan 1-0 in Celta Vigo an hneh a, Carlos Soler chuan La Liga-a Valencia tana a match 100-na chu goal nen a lawm -  top four huang chhungah an zuang lut zui. 

Santiago Bernabeu-a inkhelah Real Madrid chu chak phu zawk an ni a, an phu ang ngeiin an chak - inkhela goal awmchhun hmu tur erawhin minute 56-na an nghah thlen a ngai thung. 

Real goal awmchhun hi yard ruk vel aṭanga Benzema khung a ni a, amah ang thoa French mi Ferland Mendy-a siamsak a ni - tun season-a league goal 123 a khungna chiah a ni.

Benzema hian Atletico an mikhual hma hian Copa del Rey-ah goal a khung a, Real Zaragoza laka goal a khung hma hian match sarih zet chhung chu net a zawng hmu zo tawh lo. 

Mahse, Madrid derby khelh hma chiahin goal hmangin inrintawkna a neih belh a, Atletico lakah a khung leh ta - tun season inelna hrang hrangah goal 18 a khung tling tawh. 

Real hian season ṭantirah tluk leh din an fawm a, rin loh tak result min hmuhtir leh ṭhin. Mahse, Zinedine Zidane a enkawl team hi tun hnaiah an insiamṭha a, inelna hrang hranga an match hnuhnung 8 zetah a zawnin an chak tawh!

Spanish Super Cup-ah 'penalty' hmanga nunrawng taka an hneh hnu Atletico an ngam nawn leh a, table chung ber an luah chhunzawm bawk avangin French manager hoa champion an sawi ri leh tawh ang. 

Hetihlai hian Gareth Bale erawh dam ṭha reng chungin squad-ah telh a ni lo a, mahni tawka induh ve tak player tan chuan Madrid derby 'hot' taka squad-a telh nih loh hi a tlawm thlak ang tih a chiang. 

Bale hi January transfer-ah khan Tottenham Hotspur leh Manchester United lama kal tur anga sawi thawm a ri ring hman viau a, a chhuak ta lo - nipuiah Welsh forward bawk hian chanchin a ngah leh dawn tihna a ni. 

Diego Simeone-a enkawl Atletico-in inelna hrang hranga an match hnuhnung pangaah hnehna an chang zo ta lo a, Argentine coach hoin insiamṭhat tum viau mah se an beisei ang result an hlawh chhuak hleithei lo. 

Santiago Bernabeu-a inkhelah pawh Angel Correa chuan post tih per ve bawk mah se chance hlauhawm dang an nei meuh lo a, Jan Oblak-a'n Vinicius Jr hun ṭha neih a dansak te kha Atletico vanneihna a ni. 

Atletico tana pawi chu club 'tenau' tia sawi theih lakah pawh an theihna anga an khel chhuak lo ṭhin hi a ni. Real laka an tlawm hi fan-ten ngaidam thei mah se Eibar laka an tlawm hnua Leganes an inhnehtawkpuite kha pawm harsa a ni. 

Copa del Rey aṭangin third division club Cultural Leonesa chuan an pet chhuak a, league match hmasa 22-a goal 22 an khung hi La Liga-a an tlarhmain record an neih chhiat ber a tling hial.