Zanin dar 6:00-ah Chhinga Veng Vs Electric Veng
NEXA Independence Day Celebration Football Tournament semifinal-ah zanin dar 6:00 hian champion lai Chhinga Veng leh Electric Veng te Lammualah an inkhel dawn. Coach hmingṭha Lalsangzuala Hmar-in a club hlui Chhinga Veng a hmachhawn dawn avangin inkhel tur hi en a châkawm phah hle.
Hmasawn zel
Electric Veng coach Sanga chuan, "MFA Super Cup-ah semifinal kan thleng a, hmasawnna awm tur chuan I Day Football-ah final kan thlen ngei a ngai a ni," tiin Vanglaini a hrilh a, Chhinga Vengin player an neih ṭhat zawk thu a sawi tel bawk.
Tun ṭum inelnaah hian Sanga hote hian MFA Super Cup-a an hneh loh Chanmari FC an hneh avangin hmasawnna hmuh tur a awm tawh a, chutihrualin Chhinga Veng lakah an chak lo a nih chuan an lawm lo tawp ang. Chhingcows coach H. Lalremruata chuan, "Team dangin player an lakkhawm hnuah kan inla khawm ve chauh a, coach Sanga'n min chhuahsan chhan pawh a ni. Chuvangin player kan nei ṭha zawk tih ka pawm lo," tiin a sawi ve thung.
Tu nge ṭha zawk?
Electric Veng hi MFA Super Cup leh I Day Football an match khelh zawng zawngah ṭha taka an khelh vek theih avangin Chhinga Veng aiin an buk a rit hreta ngaih theih a ni.
Sanga hian midfield-ah Jacob Lalrawngbawla an nei a, freekick pet thiam bik player hi knockout-ah chuan danglamna thlen thei a ni a. Season liam taa striker atana chhawr ṭan David Lalchhuanawma chuan tun season-ah a ṭha tak tak tih a pholang tawh bawk.
Chhinga Veng hian match tinah goal hnih an khung ziah a, goal khungtute hi player hran vek an ni. Remruata hote hi rawlthar che rang an kawl tam a, heng player-te ho tur hian tawnhriat nei ṭha Vanlalzuidika, K. Lalnunzama leh Ṭhasiama te an neih avangin Electric Veng lakah an indah hniam tawp lo ang.
Ropuina ram
Chhinga Vengin MPL club an nih hnuah hlawhtlinna hmu lawk lo mah se Lalsangzuala Hmar-in season hnih a enkawl chhungin MPL nomawi an chawi a, MFA Super Cup leh I Day Football-ah vawi hnih ve ve an champion.
Electric Vengin MPL club an nih hnuah nomawi an la chawi ve lo a, tun hmaa football thiam veng tia sawi ṭhin hian ropuina rama let leh an duh. I Day Football nomawi chawi turin EFC-in an veng ṭhenawm Chhinga Veng an hneh a ngai a, derby match tiha sawi theih a nih avang leh zan inkhel tur a nih avangin entu anṭhahnem khawp ang.
I Day Football 2019 - Thlirna Tawi
Goal khung tamte
Hming Club Goals
Lalnunzama Chanmari FC 4
Lalthanmawia Renthlei Chawnpui FC 3
Vanlalthanga FC Venghnuai 3
Rochharzela Aizawl FC 2
Jacob Lalrawngbawla Electric Veng 2
Group A
August 5, Thawhṭanni
Mizoram Police 1 - 5 Aizawl FC
MPFC : Lalbiakhlua 38'
AFC : Jonathan Lalrawngbawla 36'; Isak Vanlalruatfela 63';
Rochharzela 69', 74'; David Lalhlansanga 85'
Electric Veng FC 3 - 1 Chanmari FC
EFC : David Lalchhuanawma 11'; Jacob Lalrawngbawla 38';
Lalengmawia 85'
CFC : Lalnunzama 50'
August 7, Nilaini
Aizawl FC 0 - 0 Electric Veng FC
Chanmari FC 2 - 2 Mizoram Police FC
MPFC : Lalramtharmawia 39' (P); Lalbiakthanga 71'(P)
CFC : Lalnunzama 77', 88'
August 9, Zirtawpni
Electric Veng FC 1 - 2 Mizoram Police FC
EFC : Jacob Lalrawngbawla 20'
MPFC : F Lalrinpuia 80'; Lalrinzuala Khiangte 83'
Chanmari FC 3 - 1 Aizawl FC
CFC : Lalnunzama 20'; Abel Lalruatfela 24'; Lalmuankima Hauhnar 29'
AFC : Joe Zoherliana 10'
Group B
August 6, Thawhlehni
Ramhlun North FC 2 - 2 Chhinga Veng FC
RNFC : M. Lalrintluanga 50' (P); Lalthankhuma 80'
CVFC : Lalsawmzela 21'; MC Malsawmzuala 43'
FC Venghnuai 4 - 3 Chawnpui FC
FCV : Vanlalthanga 34'; Isak Vanlalpeka 63'; HK Lalhruaitluanga 68'; Vanlallawma 70'
CFC : Lalthanmawia Renthlei 77', 89'; Crespo Vanlalhriatpuia 80'
August 8, Ningani
Chawnpui FC 2 - 2 Ramhlun North FC
CPFC : Moody Lalawmpuia 42',
Lalthanmawia Ralte 90+2'(P)
RNFC : Jessy Vanlalmuana 5', Lalmawizuala 59'
Chhinga Veng FC 2 - 1 FC Venghnuai
CVFC : KC Larchhuakmawia 14'; Silvana R.Lalruatkima 16'
FCV : Vanlalthanga 23' (p)
August 10, Inrinni
Ramhlun North FC 0 - 1 FC Venghnuai
FCV : Vanlalthanga 39'
Chhinga Veng FC 2 - 1 Chawnpui FC
CVFC : Ṭhasiama 45+1'; K. Lalnunzama 77'
CFC : Vanlalthlamuana 38'