Nadal tan Djere a nem lua

Rafael Nadal-a'n eng tiangin nge Australian Open bul a ṭan ang tih zawhna chu chhanin a awm ta. Spanish tlangval hian nimin khan stright set hmanga Laslo Djere hnehin second round a inhlangkai.

World number 1 hian darkar khat leh minute 52 chhung lekin 6-3, 6-4, 6-1 in hnehna a chang. A match lehpekah chuan Michael Mmoh leh Viktor Troicki inkhela a chak zawk a hmachhawn ang, player pahnih hi qualifier paltlanga inlan an nih avangin Nadal tan a hautak lo ang.

Nimin chawhma lam khan Melbourne khawpui lum zawng chu 24C vel a ni a, season danga nipui boruak lum uchuak tak ang kha a ni lo. Boruak awm dan chu tennis khelh nana nuam tawk tak a ni a, rinkai Nadal pawhin awlsam takin hnehna a chang.

Melbourne Park a thlen hnuah Nadal hi hnungzâng na vangin a buai a, ram tan ATP Cup khel tur ni mah se a inhnukdawk. Rod Laver Arena a luh meuh chuan Nadal hi a dam tawh tih a lang, duhthusam vekin la khel lo mah se Djere tan hun ṭha a siamsak lo.

Seeded pahnihna Nadal chuan, "Tun hnai ni 15 chhung chu hnungzâng na vangin harsatna ka nei, tunah erawh a reh ta niah ka ngai," a ti a, tihrawl na vangin chet velnaah buaina a neih loh thu a sawi.

A vanglai pawhin Nadal hian service a nei ṭha tawk lo tia sawisel a ni ṭhin. Australian Open a khelh ṭanni pawh hian a vaw na tawk lo a, chutih rualin a khingpui service vawi ruk ngawt a chhuhsak theih avangin a dingchang.

Roger Federer leh Nadal ten Grand Slam nomawi 20 ve ve an chawi tawh. Tun ṭumah hian hliam vangin Federer a inlan thei lo a, a elpui Nadal-a'n hlawhtlinna a chang a nih chuan major title la hnem ber record a siam ang.

Kum 34 mi Nadal chuan, "Nomawi sawi a la hun lo, match hmasa bera ka chak thei hi ka lawm. A bik takin set hloh loa chak hi a pawimawh, tunah chuan second round ka khelh tur chauh ka la ngaihtuah dawn," tiin a sawi.

Nadal tan hard court hi tennis khelh nana hmun duhthusam a ni lo. Amaherawhchu 2009 khan Australian Open nomawi hi a lo chawi tawh, 2019 mai pawh khan final a la thlen theih avangin kuminah pawh hlawhtling turin inrintawkna a nei ang.

Nimin inkhel dangah seeded palina Daniil Medvedev leh amah ang bawka Russian player Andrey Rublev ten hnehna an chang a, seeded 13-na David Goffin erawhin match point vawi li a hmuh a chhawr ṭangkai theih loh hnuin a chak lo.

Goffin hi tualchhung tlangval Alexei Popyrin nen an inkhel tawk hle, wildcard hmanga inlan ni mah se Popyrin a zam bik lo - amah aia ṭha leh tawnhriat nei hnem zawk hi 3-6, 6-4, 6-7 (4-7), 7-6 (8-6), 6-3 a hnehin second round a lut.

A zawna match 15 a chakna ni turin Medvedev chuan Vasek Pospisi 6-2, 6-2, 6-4 in a hneh a, season hmasa a hman ṭhat avanga hriat hlawh zual Rublev chuan German tlangval Yannick Hanfmann lakah 6-3 6-4 6-4 in hnehna a chang ve bawk.