Club World Cup Bayern-in Al Ahly hnehin final an lut

FIFA Club World Cup final lut turin Bayern Munich chuan Thawhṭanni zan khan Egyptian club Al Ahly chu 2-0 in an hneh. Bavarians hian February 11, Ningani zan dar 11:30-ah Mexican club Tigres UANL nen Al Rayyan, Qatar-ah final an khel ang.

Al Rayyan Football Stadium-ah Bayern tan Robert Lewandowski-a'n hun chanve hmalam leh hnu lamah goal khat ve ve a khung a, European champion-in African champion lakah harsatna an tawk lo. German club hian kum 2013 khan Club World Cup nomawi a vawi khat nan an chawi a, tun ṭumah hian chawi leh theihna hun ṭha an nei leh chiah.

German manager Hansi Flick-a'n sa huai a ser a, a player neih ṭhat a luhtir. Goal khung khawl Lewy hma tawngah awmin Serge Gnabry, Thomas Muller leh Kingsley Coman ten an thlawp. Midfield-ah Joshua Kimmich leh Marc Roca an awm a, ku 24 mi Spanish midfielder Roca hian Bavarians tan a lai lum a luah chho.

Tlarhnungah Alphonso Davies, David Alaba, Jerome Boateng leh Benjamin Pavard te an intlar a, keeper-ah Manuel Neuer awm bawkin African champion player leh European champion player-te an inthlau hle. 

Ṭan phat aṭangin Bavarians-in inkhel an thunun nghal a, Serge Gnabry-a'n a hun ṭha hmasa chu a crossbar chungah a tauh. Minute 17-naah goal kan hmu a, Coman-a shot-cross chu Gnabry-a'n fing takin Lewandowski a pe let a, Polish forward hian awlsam takin a khung.

Al Ahly player-ten keeper Neuer an tibuai pha meuh lo a, Bayern erawh chance ṭha a khat tawkin an nei. Lewy-a'n first half-ah a khung belh thei lo a, second half-ah goal an khung lawk lo bawk.

Minute 86-naah substitute Leroy Sane cross chu Lewandowski-a'n a tauh lut a, goal dang a luh belh tawh lo. Inkhel thununtu Bayern-in 2-0 in hnehna an chang.

Bayern-in inkhel an thunun a, keeper Manuel Neuer-a'n halftway line thlen chang te a nei hial. Heti chung hian goal hnih chauh an khung avangin Hansi Flick a lawm lo.

Bavarians manager Hansi Flick chuan, "Hnehna kan chan avangin ka lawm a, chutihrualin kan la khel ṭha tawk lo tih chu kan hre vek ang. Goal hnihna kan khung lawk loh avangin kan tan hna a harsat phah a, final-ah chuan a danglam tawh ngei ka beisei," tiin a sawi.

Bavarians hian Hans-Dieter Flick kaihhruaina hnuaiah inelna panga Bundesliga, DFB-Pokal, DFL-Supercup, UEFA Champions League leh UEFA Super Cup te an champion tawh a, a parukna ni turin Club World Cup-ah champion an tum dawn.

Goal hnih khungtu Lewandowski sulhnu a ropui zel. Polish striker hian inelna chi hrang hrang Bundesliga, German Cup, German Super Cup, Polish first leh second divisions, Polish Cup, Polish Super Cup, Champions League,  Europa League, Euro C'ship, Nations League leh Club World Cup-ah te a khung vek tawh a ni.