England-in India an hneh

Test match vawi li khelh tura hmasa berah England-in India an hneh a, Chennai-a khelh Test match hmuhnawm zetah hian mikhual team hi run 227-in an chak.

India leh England hian February 13-17 khian Chennai-ah bawk second Test an khel dawn a, Virat Kohli hoten series lak an tum a nih chuan chetsual a thiang tawh lo.

Ṭhumvawrah England an chak a, captain Joe Root-a'n bat hmasak a thlang. Kum 30 mi Joe Root hian Sri Lanka 2-0 a an hneh ṭumin century a siam ve ve a, India lakah pawh hian double century siamin run 218 zet a vaw chhuak.

England tan Dom Sibley (87) leh Ben Stokes (82) te an che ṭha bawk nen first innings-ah run 578 zet an siam. Mikhual team chak turin an dinhmun a ṭha a, England spinner Dom Bess hmaah India batsman te an che thei lo. 

Kum 23 mi Bess hian run 76 pein wicket li a la a, a vawm hlum pali hi Virat Kohli (11), Cheteshwar Pujara (73), Ajinkya Rahane (1) leh Rishabh Pant (91) te an ni.

India tan Washington Sundar a che ṭha a, thi loa run 85 zet a siam zarah draw theihna kawng a inhawng. Men in Blue hian run 337 chauh an siam avangin England-in an 'follow on' (bat

chhunzawm) tir thei a, mahse bat an thlang zawk.

Second innings-ah England an che ṭha tawk lo a, khawtual tlangval Ravinchandran Ashwin-a'n wicket ruk lain run 61 chauh a pe. England hian run 178 chauh an siam a, mahse 46.3 over chauh an hmang a, India tan run 420 target an siamsak.

Ni linaah Jack Leach-a'n Rohit Sharma a vawm hlum hman a, India tan ni ngana a harsat phah. Men in Blue tan chak harsa mah se draw theih dan a awm a, amaherawhchu India batsman te an daih rei tawk lo.

Virat Kohli (72) leh Shubman Gill (50) te che ṭha ve deuh mah se result thlak danglam turin an che ṭha tawk lo. India batsman-ten beisei an pha lo a, English bowler Jack Leach (76/4) leh kum 38 mi James Anderson (17/3) lakah an thamral.

England captain Joe Root chuan, "Ṭhumvawra kan chak kha a pawimawh a, kan chan ṭhatna hmang ṭangkai turin kan tihtur kan ti ve bawk. Ni nga chhungin kan khel ṭha a, kan game plan kan ti hlawhtling. Kan khingpui hi India an ni a, min hneh ngei tumin tha pui an rawn chhuah ang," tiin a sawi.

India captain Virat Kohli chuan, "Pressure kan pe tawk lo. A tawpah chuan rilru put hmang a pawimawh a, kan vawm thei a, ka vaw thei tih kan hriat a ṭha. Chak loh ṭum chu a awm tur a ni a, thawhchhuah leh ngei kan tum ang," tiin a sawi.