Hamilton-a'n season khat atan contract ziak

Formula 1 world champion Lewis Hamilton chuan Mercedes tan contract thar a ziak ta, a team awm mekna Mercedes nen season thar lo awm leh tur atan thawkho turin inremna an ziak - kum khatah pound maktaduai 30 a hlawh ang.

Kum 36 mi Hamilton contarct hmasa kha season tawp rual khan a zo, inremna an nei zui mai dawn nia a lan laiin an in dawr rei viau. Hun rei zawk atan contract a ziah rin ni mah se kum khat daih chauh inremna an nei hian zawhna a siam tam hle.

Season hmasa khan coronavirus vangin inelna kalphung tih danglam a awm nual - a hmunah entu an awm mumal lo. March 28 hian season thar khuhhawn nan Bahrain-ah inelna an nei dawn a, Mercedes leh Hamilton te fiahin an awm dawn.

Britain tlangval Hamilton-a'n Grand Prix hnehna chan hnem lamah Michael Schumacher a khum tawh a, world title lak hnem lamah pawh Schumacher hi a nihrual leh tawh - kuminah a champion leh a nih chuan record a siam dawn.

Hamilton chuan, "Kan team hian hlawhtlinna hrang hrang kan lo chang tawh. Season thar lo awm turah pawh hlawhtlinna chan leh kan beisei a, intlansiak tlan kawngah leh a pawn lamah hmasawnna kan neih ka beisei," a ti.

A kum tam deuh tawh mah se Hamilton hi F1 driver ṭha ber a la ni reng a, kum 2021-ah pawh ṭha takin a tlan theih a la rinawm. Mercedes car khalh chungin Ferrari car tlan chak thu a sawi fo a, hei vang hian a hun tawp lamah team dang a zawm mai ringtu an tam.

Team boss Toto Wolff chuan contract chungchanga inbiakna a rei chhan chu Covid-19 vang a nih thu a sawi. Hamilton hian hrileng a kai a, hei bakah hian hrilengin khawvel pum a nghawng buai avangin sum leh pai chungchangah ngaihtuah nawn ngai a awm thu a sawi bawk.

Wolff chuan, "Lewis leh kei bakah Mercedes chhungkaw inkar a ṭha em em a, kum khat atana inremna neih phawt hi a ṭha. December leh January thla a lo thlen hunah chuan kan hma hun zel atana awm dan tur pawh kan sawiho leh zawk ang," a ti.

Khawthlang media-te chuan 2022 season-ah chuan Mercedes hian Hamilton an chhawr zel an ring tawh lo. Britain driver thlak tur an inrinsiak leh der tawh a, driver ṭha tak tak zingah Max Verstappen chu hming langsar leh rinkai ber a ni mek.