Champion lai a chak, champion hlui a tla

Australian Open hmeichhe singles champion lai Sofia Kenin chuan nimin khan Maddison Inglis hnehin second round a inhlangkai. Vawi hnih champion tawh Victoria Azarenka erawh hneh nei loin a zinkawng a tawp nghal.

Thawhṭan zan khan champion tura rinkai zinga mi Simona Halep chuan minute 59 chhung lekin Lizette Cabrera chu 6-2, 6-1 in a hneh. Romanian nula hian vawiinah Ajla Tomljanovic a hmachhawn leh ang.

Tualchhung nula, wildcard hmanga inlan Maddison Inglis lakah awlsam takin Kenin a chak mai bik lo. Darkar khat leh minute 26 an inkhelh hnuah American nula hi 7-5, 6-4 in a vannei zawkah a ṭang.

Kum 22 mi Kenin chuan, "Boruak a danglam viau, a nihna takah chuan engthawl leh zalen takin ka inkhel lo. Ka rilru hi 100%-in a la inpeih lo tih ka chiang," tiin coronavirus vanga ni 14 khung hran an nihna chuan nghawng a neih thu a sawi.

Season hmasa khan Kenin hian hard court chunga a ball vuak nat theihna a chhawr ṭangkai. Kuminah pawh hlawhtlinna chan a duh a nih chuan na taka ball vuak hi a hmanraw pawimawh a ni leh dawn, tihsual vanga khingpuite point pek tlem a zir tel a ngai bawk ang.

Azarenka-i'n 2012 leh 2013 khan Melbourne Park-ah hian hlawhtlinna a lo chang tawh, kuminah hian seeded 12-na pek niin champion tura rinkai zingah a tel phak. Mahse, mi hriat hlawh lo Jessica Pegula lakah 7-5, 6-4 in a tlawm.

Australian Open khel tura player zin lut zawng zawng kha ni 14 chhung khung hran vek an ni. An zinga 72 chu an thlenna 'room' chhuahsan lo tura tih an ni a, heng zingah hian Azarenka pawh a tel - tournament hma khan inbuatsaihna match vawi khat bak a khel lo.

Azarenka chuan, "Ni 14 kan inkhung hran khan nasa takin min nghawng, eng nge tih ber tur pawh kan hre thei lo chu a ni ber. Tunah chuan zalen taka boruak thianghlim hip ka chak," tiin nun zalen neih a hlut thu a sawi.