U18 player lakluh dana FIFA dan bawhchhia

Manchester City-in youth player an lak danah FIFA dan an bawhchhia tih an pawm a, 370,000 Swiss Francs (£315,000) chawitir an ni. Pep Guardiola hote hian 'transfer ban' erawh an pumpelh. 

FIFA dan hnuaia article 19-ah, "Player-in kum 18 an pelh chauhin international transfer phalsak an ni," tih a inziak a, Man City chuan dan an bawhchhia tih an pawm. Chutihrualin he dan bawhchhe tawhtu Chelsea erawh FIFA hian transfer window vawi hnihah player lak a phalsak loh bakah pawisa a chawitir thung. 

Man City hian 2016 khan Argentine club Velez Sarsfield aṭangin midfielder Benjamin Garre chu kum 16 a tlin champha zawhah an lalut a, nikum khan FIFA chuan Argentine midfielder chungchangah tihsual an nei lo tih an finfiah tawh a ni.

Amaherawhchu nikum vek khan Ghana-a Right to Dream football academy-a player pahnih George Davies (Sierra Leone) leh Dominic Oduro  (Ghana) te chuan Danish chanchinbu Jyllands-Posten hnenah kum 18 tlin hmain City tana an inziahluh thu leh youth team inkhela an inlan thu an sawi. English club-in African rawltharte hi kum 2016 khan an lalut.

Manchester City chuan FIFA Disciplinary Committee-in an chunga hremna a lekkawh dan an pawm a, an tihsual danah insawifiahin dan an hriatfiah loh vang a nih thu an sawi bakah trial an hmachhawn bakah friendly match chauh an khelh thu an sawi lang bawk.

English club-in dan an bawhchhiat hi December 2016 hma lama thil thleng vek a ni. FIFA chuan December 2016 hian dan hrilhfiahna an tichhuak a, hemi hnu hian City chuan dan an zawm vek thu an sawi. Manchester City chuan, "FIFA-in kum naupang ven a tumna kawnga a hmalakna kan ṭawmpui a, tun ṭuma an chhui zuinaah pawh ṭha taka thlawpin engkim a lang tlang vek a, ṭanna chhan ṭha tak pek an ni vek bawk," tiin thuchhuah an siam.

May 2017 khan Premier League chuan Man City hi academy player an lak danah dan an bawhchhiat avangin £300,000 an chawitir bakah kum hnih chhung academy player la thei lo turin an hrem. Tunah hian Financial Fair Play chungchangah UEFA chuan Manchester City hi a la chhuizui mek bawk.

Kumin February thla khan FIFA chuan Chelsea hi youth player 29 zet an lak dan dik loh avangin transfer vawi hnihah player lak an phalsak loh bakah 600,000 Swiss Francs (£460,000) an chawitir.

Blues hi infiamna khawvela thubuai ngaihtuahtu sang ber Court of Arbitration for Sport (CAS)-ah an zualko a, amaherawhchu CAS hian nipui laia an ngaihtuah hman loh avangin London club hian transfer window hman zawh takah khan hremna hi an hmachhawn tawh. 

CAS hian Chelsea hremna hi an tihnepsak a nih chuan January thlaah player an lalut thei ang a, amaherawhchu hremna ngai ang an kalpui a nih chuan Frank Lampard-a'n a player neih sa nen season a hman tluan a ṭul dawn 

a ni.

FIFA chuan a hnuaia tarlan dan hi an zawm a nih loh chuan Under 18 player tan international transfer phal a ni lo. He dan hi naupan venna atana siam a ni a, human trafficking laka invenna a ni.

•    Player nu leh pa chu football vang ni loa naupang club khelhna tur awmna hmuna an pem chuan.

•    Player khelhna sa leh an zawm tur club chu European Union emaw European Economic Area huam chhunga an awm a, player chu kum 16-18 inkar an nih chuan. Hetah hian player lei tur club chuan zirna, training, an chenna chungchangah dan zawm tur tam tak an nei bawk.

•    Player chenna chu club awmna aṭanga 100 km bial china an awm a nih chuan.