Champions League khel lo tur

Europe-a club langsar pawl ni ve reng ṭhin Celtic leh Porto-in season tharah Champions League an khel thei dawn lo - qualifying third round-ah an tlawm ve ve!

Celtic hian an mikhual CFR Cluj chu 4-3 in an ngam lo a, inkhel hmasaah 1-1 a an lo inhnehtawk tawh avangin 5-4 in an tlawm -  Europa League lamah rilru an pek a ṭul tawh ang. European champion hial lo ni tawh FC Porto-in Russia-a an result neih ṭhat sa an chhawm thei lo a, FC Krasnodar lakah 3-2 in an tlawm. 

Portuguese club hian an inkhelh hmasakah 1-0 in hnehna an chang a, inkhel pahnih belhkhawmah 3-3 a ni. Khualmuala goal khung hnem zawk Russian club Krasnodar an tlang. 

Celtic Park-a inkhelah mikhual team-in goal an khung hmasa zawk a, minute 27-na lekah Cirpian Deac chuan Cluj tan goal hmahruai a tauh lut. 

Mahse, Scottish club-in James Forrest leh Odsonne Edouard hmangin second half-ah an chhanglet a, inkhel tawp se chuan Celtic chu tlang tur an ni. Mikhual mah ni se Cluj-in tlawm erawh an lo tum hauh lo - minute 74-naah Billel Omrani chuan penalty hmangin a rawn khung ve leh a, away goal rule hmangin Cluj dinhmun a ṭha ve leh chiah!

Romanian club lawmchhung a rei lo - minute hnih a liam awrh tihin Scottish football-a striker 'hot' ber pawl Ryan Christie-a'n goal dang a rawn khung ve leh a, Celtic dinhmun a ṭha leh ta thung.

Cluj an huaisen 

Celtic Park-ah mualneitu dinhmun a ṭha a, tlang mai turah pawh ngaih an ni. Mahse, Cluj an huaisen a, an muala an inhnehtawkpui tawh team aṭang hian engmah hawn loa kir an tum lo. 

Minute 80-naah penalty hmanga an goal hnihna khungtu Omrani chuan si phurh sutna goal a rawn khung a, 3-3 a ni. Khualmuala goal khung tam zawk Cluj dinhmun a ṭha. Celtic-in playoff lut turin goal khat tal khung leh an ngai tih an hria a, mahse hun a tam tawh lo - hun pek belh minute sarihnaah an chhuah leh ta zawk a, George Tucudean chuan Cluj tan a khung belh. 

Hun a tawp zui a, Celtic an tlawm a, an mualah ngei tih mualphoin an awm - Brendan Rodgers an ngai vawng vawng ang!

Liverpool manager hlui Brendan Rodgers-a'n 2016-a Celtic a enkawl tirh khan season thum ngawt chu Champions League an khel tawh lo a, Northern Irish manager hian an beisei ram a thlenpui. 

Celtic-a a season hmasa berah Champions League a khelhpui nghal a, a season hnihnaah pawh a inhlankaipui - season hmasaah erawh an tling lo a, season laihawlah Leicester City a pan san. Season hnih a hman tluan chhungin domestic treble a chawi ve ve bawk a, a chhuak chiah a, Neil Lennon hnuaiah Champions League qualifier third round-ah an tla zui nghal!

Celtic fan-ten Rodgers an ngai viau a nih pawhin a awm lo hran lo. Neil Lennon chuan, "Keimahni lo chu dem tur an awm lo. Tlarhnung ven ṭhat loh chuan kan tuar tur a ni," tiin chhuanlam a zawng lo. 

Russia-a inkhelh hautakzia an sawi ṭhin a, he thil hautak hi paltlangin Porto hian inkhel hmasaah 1-0 in FC Krasnodar an hneh tawh - an hmaah hna awlsam tak a inchhawpa ngaih a ni tawh. 

Mahse, mahni mualah Porto an mualpho. Mikhual team hian minute 34 chhung lekin goal thum an rawn khung a, Portuguese club an mualpho. Russian club tan hian Dutch midfielder Tonny Vilhena chuan minute thumna lekah goal hmahruai a khung a, Russian winger Magomed Suleymanov chuan goal hnihin a chhunzawm. 

Porto hian second half-ah Ze Luis leh Luis Diaz hmangin si phurh rawn sut ṭhen mah se a tir lama an chetsual rah an seng a, 3-2 a tlawmin an tla. 

Season hmasa Champions League semifinalist Ajax-in Greek club PAOK chu 3-2 in an hneh a, inkhel pahnih belhkhawmah 5-4  in an chak; playoff-ah APOEL an hmachhawn ang. 

Ajax tan hian season hmasaa an 'hero' Dusan Tadic bawk a langsar a, penalty aṭangin goal hnih a khung - Nicolas Tagliafico chuan goal khat a thawh ve bawk a, PAOK tana Ajax Academy chhuak Diego Biseswar goal hnih khungin awmzia a nei lo. 

Inkhel ngaihven hlawh dangah 2-2 a an inhnehtawk hnuin Red Star Belgrade chuan penalty-ah 7-6 in FC Copenhagen an hneh a, penalty lamah pawh hian an inhnehtawk hle - vawi 22 ngawt an pet. Club Brugge chuan inkhel pahnih belhkhawmah 4-3 a Dynamo Kiev hnehin an tlang bawk a, Ukraine-a second leg hmuhnawm zetah team pahnihah player pakhat ve vein red card an hmu a, injury time-ah goal an khung ve ve bawk!