I Day Football-ah champion thar awm dawn

NEXA I Day Celebration Football Tournament chu zanin tlai dar 5:30 hian Lammualah a hmawr bawk a ni dawn. MPL club thar FC Venghnuai leh Electric Veng FC ten nomawi an inchuh ang.

MPL awm hnuah Electric Veng FC hi club lian zinga chhiar tel an ni lo a, season liam ta khan a vawi khat nan Mizoram league sang berah an inlan. EFC hian bul ṭan ṭha mah se league match tawp bera Mizoram Police an hneh loh avangin semifinal an khel pha lo.

Kuminah Electric Veng hian coach tawnhriat nei ṭha Lalsangzuala Hmar an lalut a, an rilru put hmang a dang. MFA Super Cup-ah semifinal an thleng a, sulhnu nei ṭha zawk Chanmari FC lakah penalty shootout hmangin an chak lo.

Electric Veng an thlen chinah an lawm lo, coach Sanga'n player zawng zawng chu dressing room pan turin a hrilh nghal. Goalkeeper Lalmuansanga leh defender C. Lalnunmawia te mittui nen an rawn chhuak a, chak ngei an duh tih a lang.

EFC boss Sanga chuan, "Chanmari FC hnuaiah kan awm reng dawn lo," tiin Vanglaini a hrilh a, a chetzia leh a hmel aṭang chuan ṭha zawkin an rawn let dawn tih a lang.

Electric Vengin I Day Football match hmasa berah Chanmari FC 3-1 in an hneh nghal a, group of death tia an sawi group A aṭangin semifinal an lut.

EFC awmpui team pathum Chanmari, Mizoram Police leh Aizawl FC te hi season liam ta MPL-a an tluk loh vek an ni a, tunah chuan an elpha tawh. Semifinal-ah Electric Vengin I Day Football champion lai Chhinga Veng an hmachhawn zui a, inkhelh hma hauhin Sanga awmna lam bûk a rit zawk. Chhingcows-in ball chang tamin ball inpe kual tam mah se Jacob Lalrawngbawla freekick hmangin EFC hi 1-0 in an chak a, rilru huaisen zawk danglamna chu goal khat hi a ni.

FC Venghnuaiin inpuahchahna ṭha an neih hman loh avangin MFA Super Cup an la hmachhawn ngam lo a, MPL club an nih hnua inelna an hmachhawn hmasak ber chu I Day Football hi a ni.

Coach Rindika Hmar enkawl FC Venghnuai hian Chawnpui FC hnehin bul an ṭan a, Chhinga Veng hneh lo mah se inkhel pawimawhah Ramhlun North an hneh. MPL club thar tan semifinal thlen phak hi a harsa a, amaherawhchu mumang ram aṭanga ṭhanharh duh loin I League club Aizawl FC an hneh - an hun tawn mek hi suma lei theih a ni lo.

Chutih rualin FC Venghnuai hi vanneih vang ringawta final thleng an ni lo. An coach Rindika hi Mizo coach zinga tualchhung football en nasa leh inzir peih a ni a, a hman ṭangkai theih tur player a lakluh bakah club hmangaihna nena enkawl a nih avangin team chakna hnar a ni.

Player neih dan thlir chuan 'Dream Final' tih tur chu ni lo mah se an team din chhoh dan aṭanga teh chuan inkhel en a châkawm a, entu an ṭhathnem a rinawm bawk avangin organiser lam thlirna aṭang chuan 'Dream Final' a ni ang.

Electric Vengin tun hma CYMA Football-ah entu an nei ṭha ṭhin a, MPL-ah pawh entu an la nei ṭha zel. Football leh Electric Veng hmangaihtu chuan an veng football team ṭawiawm chu a tih ngei tur a ni a, rolkhawlhna vanga Lammual a pan thei lo a nih pawhin 'inthiam lohna nasa tak' a nei ngei ang.

Venghnuai lah chuti bawk - Aizawl FC an hneh zawha dressing room hmaa zai rual pha chin kha chuan hnehna chan nawmzia an tem pha ang! Chutihrualin tunah hian a hmawr an la bawk lo a, an hmaah I Day Football nomawi a la inchhawp. Football ṭantu ang chauh ni loin YMA, MHIP, MUP bakah vengchhung pawl hrang hrang anga an 'veng club' ṭawiawm hun tak a ni a, Venghnuai hi eng ang chiaha inlungrual nge tih fiahin a awm dawn.

Final - Vawiin Inkhel Tur 

Saron Veteran FC    2:00 PM    Mizoram Police FC Veteran Team

FC Venghnuai    5:30 PM    Electric Veng

Hmeichhe inelnaah Vakiria FC an champion

Hming    Club    Goals

Lalnunzama    Chanmari FC    4

Vanlalthanga    FC Venghnuai    3

Jacob Lalrawngbawla    Electric Veng    3

Lalthanmawia Renthlei     Chawnpui FC    3

Rochharzela     Aizawl FC    2

ELECTRIC VENG

Group Stage

August 5, Thawhṭanni

Electric Veng FC    3 - 1    Chanmari FC

EFC : David Lalchhuanawma 11'; Jacob Lalrawngbawla 38'; Lalengmawia 85'

CFC : Lalnunzama 50'

August 7, Nilaini

Aizawl FC    0 - 0    Electric Veng FC

August 9, Zirtawpni

Electric Veng FC    1 - 2    Mizoram Police FC

EFC : Jacob Lalrawngbawla 20'

MPFC : F Lalrinpuia 80'; Lalrinzuala Khiangte 83'

Semifinal - August 13, Thawhlehni

Chhinga veng FC    0 - 1    Electric Veng FC 

EFC : Jacob Lalrawngbawla 39'

August 6, Thawhlehni

FC Venghnuai    4 - 3    Chawnpui FC

FCV : Vanlalthanga 34'; Isak Vanlalpeka 63'; HK Lalhruaitluanga 68'; Vanlallawma 70'

CFC : Lalthanmawia Renthlei 77', 89'; Crespo Vanlalhriatpuia 80'

August 8, Ningani

Chhinga Veng FC    2 - 1    FC Venghnuai

CVFC : KC Larchhuakmawia 14'; Silvana R.Lalruatkima 16'

FCV : Vanlalthanga 23' (p)

August 10, Inrinni

Ramhlun North FC    0  - 1    FC Venghnuai

FCV : Vanlalthanga 39'

Semifinal - August 13, Thawhlehni

Aizawl FC    0 - 0    FC Venghnuai

Penalty Shootout-ah FC Venghnuai 4-3 in an chak