Japan-ah Siami telna India feh chhuak

Olympic 2020 khelh ngei tumin India nula hockey khel thiamten hmalam an pan zel a, mipa leh hmeichhe team chu Olympic Test event nei turin Pathianni khan Japan panin Bengaluru aṭangin an chhuak.

Lalremsiami Hmar telna hmeichhe team hian Australia, China leh Japan te an hmachhawn dawn, mipa team lamin Japan, New Zealand leh Malaysia te an khelhpui ve thung dawn a ni. Nakkuma neih tur Olympic khel tur a la chiang lo a, November thla aṭang hian qualifier khelh a ni ang. Tuna India team zin chhuak pawh hi qualifier khel tura inbuatsaihna zinga mi a ni dawn.

Mizo nula Remsiami chuan, "Thawhṭanni khan Japan kan thleng a, kan ram ai chuan khua a lum deuh a, boruak a danglam. Mahse, kan inbuatsaihna a ṭha a, kan khingpui tur team kan huphurh hran lo. "Training kan neih zawng zawng hi Olympic khelh theih nana tih vek a ni tawh a, kan tum ram thleng turin theihtawp kan chhuahin kan thawkrim tak meuh meuh a ni. Result ṭha tak nen India-a rawn let leh ngei kan tum," tiin Vanglaini 

a hrilh.

Kolasib nula, Thenzawl Hockey Training Center aṭanga inzir chhuak Remsiami hi tun hnaiah chuan India tan player ṭangkai leh pawimawh a ni zel a, tun ṭumah pawh hian captain Rani Rampal nen tlarhma lamah team inngahna an ni ang. India captain Rani chuan, "Tun hnaiah Japan leh China lakah result kan nei ṭha thawkhat a, team ṭha Australia pawh kan hneh thei tih kan lantir tawh bawk. Kan khingpui tur ram lian pathum hi kan hlau lo," tiin beisei an neih san thu a sawi. Inelna hi August 17 aṭangin khelh ṭan a ni dawn a, India hmeichhe team hian a thlengtu Japan an hmachhawn nghal ang.