Man City-in goal 100 an khung tling tawh

Manchester City chuan Premier League nomawi chu Liverpool lakah chan mai an tum lo - Pathianni zan khan Huddersfield Town chu 3-0 in an sawp. Pep Guardiola hote hian tun season-ah inelna hrang hrangah goal 100 an khung tling der tawh a, an squad a chhah bawk avangin league hmahruaitu Jurgen Klopp-a hote hahdamin an awm thei lo ang.

John Smith's Stadium-ah Man City hi ṭum dan angin an goal nawr a na tawk lo a, an game play a mawi tawk lo, chutichung chuan an chak chiang hle. City tan hian Danilo (18'), Raheem Sterling (54') leh Leroy Sane (56') ten goal khat ṭheuh an khung.

Man City wing back Danilo chuan hla tak aṭangin goal-ah risk-in Terriers defender Christopher Schindler-a'n a tauh per zarah goal-ah a lut. Brazilian defender hi tun season-a City player zinga goal khung thei 17-na a ni.

City an khel ṭha tawk lo chungin second half-ah 'player class' danglamna a lang a, minute 54-naah vei lam aṭanga Leroy Sane cross chu Raheem Sterling-a'n a tauh goal mawi hle.

Minute hnih hnuah Gabriel Jesus aia bul ṭan Sergio Aguero chuan Sane tan tauh sakin Germany international hian ṭha taka lalutin 'cool' zetin a khung.

Man City hian goal khung belh lo mah se goal an chhuah lo. Pep-a hote hian Liverpool an hneh hnuah match li khel leh tawhin an clean sheet vek. Terriers nen hian goalkeeper Ederson hian hna a nei meuh lo a, chutichung chuan Brazilian keeper hian fak a phu.

Kum 25 mi Ederson hian 2017-18 season ṭan aṭang khan clean sheet vawi 26 a nei tawh a, hemi hunchhung hian keeper dang zawng aiin clean sheet a ngah zawk.

City manager Pep Guardiola chuan, "Kan khelh dan aṭanga thlir chuan goal thum bak kha chu khung belh kan phu lo. Kan khelh hmabakah hma kan sawn a ṭul. Tun hnaiah League leh Carabao Cup-ah kan khel ṭha em em a, amaherawhchu tun ṭuma kan inkhel erawh inenfiahna tur ṭha tak a ni thei ang," tiin insiamṭhat zel a ṭul thu a sawi.

Citizens hian league match 23-ah point 56 an hmu a, Liverpool an phak lohna chu point li a ni. Pep Guardiola chuan, "Liverpool an chak a nih chuan kan chak a ngai. An chak lo a nih pawhin kan chak tho a ngai," tiin champion an tum a nih chuan chetsual a thiang tawh loh tih a sawi.

Man City hian tun karah League Cup semifinal second leg-ah Burton an tlawh dawn a, kartawpah Burnley FC chu FA Cup fourth round-ah an mikhual ang. Hemi hnu hian hmabak a harsa chho dawn a, league-ah Newcastle, Arsenal leh Chelsea te an hmachhawn zawhah Champions League last 16-ah Schalke an hmachhawn dawn. 

Man City hian 2013-14 season khan Manuel Pellegrini kaihhruaina hnuaiah match 34 an khelhah goal 100 an khung tling a, Pep Guardiola hote hian tun season-ah century siam turin match 35 chiah an mamawh ve bawk.

Nikum khan Man City hian goal 100 khung turin match 38 an mamawh a, an record en letin Pep-a hote hi hma an la sawn zel tiin a sawi theih. Amaherawhchu league-ah erawh Liverpool an che ṭhat em avangin Man City hi pahnihnaah an awm mek.

Team pahnih inelna hrang hranga an chet dan khaikhin chuan Reds hian City hi an tluk lo hle. Pep-a hote hian League Cup final an thleng tawhah a ngaih theih a, FA Cup leh Champions League-ah an la dam bawk. Hetihlai hian squad pan zawk Liverpool chu FA Cup leh League Cup-ah an tla tawh thung.

Goal khung kawngah pawh City an che ṭha lawr a; Premeir League (62),  UCL (16), FA (7), League Cup (15) leh Community Shield (2) nen goal 102 an khung tawh a, Europe league sang panga zinga anmahni hnaih bertu Paris St Germain pawhin goal 12 laiin an la pha lo. English club zinga anmahni hnaih bertu Liverpool phei chuan goal 65 an khung tawh a, an inthlauhna hi a tam hle.