Oldham leh Paul Scholes indawr

Manchester United legend Paul Scholes chu League Two club talbuai mek Oldham Athletic chuan an club enkawl turin an duh a, in dawrna an kalpui mek. 

English Football League-a division hniam ber club hian December khan an manager Frankie Bunn chu a hna aṭangin an chawlhtir a, a thlaktu tur an la neih loh avangin academy boss Pete Wild chuan manager hna hi a chelh lailawk a ni. 

Kum 2013-a inkhelh chawlhsantu Scholes hi Oldham ṭantu a ni a, an league match hnuhnung bera Sol Campbell enkawl Macclesfield Town laka 2-1 a an tlawm lai inkhel pawh a hmunah a en - kum 2017 khan Oldham nen hian an lo indawr tawh. 

Scholes hian khelmual chhungah tawnhriat a ngah viau nachungin coaching lamah erawh sulhnu sawi tham a la nei lo. 

Kum 2014-a Ryan Giggs-a'n United a enkawl lailawk lai khan coaching staff zingah a tel a, Manchester United Class of '92 player pangain non league club Salford City-a share an lei khan Phil Neville nen 2015 khan manager lailawk an ni dun bawk. 

Scholes hian Oldham hi a enkawl dawn a nih chuan League Two invawrhkai tura dinhmun ṭha taka awm mek Salford-a neitu nihna a neih avang hian buaina a awm mai thei.