Number 1 Halep a tla

Australian Open khelh mekah world number 1 leh hmeichhe seeded pakhatna ni bawk Simona Halep chu last 16-ah a tla. Romanian nula hi nimin tlai khan Serena Williams lakah darkar khat leh minute 47 chhungin 1-6, 6-4, 4-6 in a chak lo zawkah a ṭang.

Rod Laver Arena-a inkhelah Halep chuan Serena service hmasa ber a chhuhsak nghal a, mahse set khatna bikah game dang a lak chhunzawm miah lo. Set hnihnaah Helep-i'n service hmasain a hum vek a, 5-4 a hma a hruai hnuah Serena-i service chhuhsakin set a la ve leh.

Player pahnih ten inrintawkna an nei chho a, set hnuhnung ber a hmuhnawm. An service an hum chhoh zak zak hnuah Serena-i service lain ṭum nga ngawt an deuce hnuah American nula tlang chhoin 3-3 a ni. Grand Slam vawi 23 champion tawh hian harsa taka a game thumna a lak hnuah a hawi kir tawh lo a ni.

Kum 37 mi Serena chuan, "Simona hi world number 1 a ni a, hmachhawn a harsat tur zia chu hriat sa a ni. Inkhel ngaihnawm tak a ni a, harsa tak taka point hlawhchhuah a awm te hian chak hlutna min hriat nawn tur ṭhin," a ti. 

Australian Open nomawi vawi sarih chawi tawh Serena hian a match lehpekah chuan Karolina Pliskova a hmachhawn leh ang. Pliskova hian darkar khat chhung lekin Wimbledon leh French Open champion tawh Garbine Muguruza chu 6-3, 6-1 in a lo hneh ve bawk a ni.

Serena-i'n Australian Open nomawi a chawi thei a nih chuan Margaret Court-i record nih rualin major title la hnem ber (24 titles) a ni thei dawn. Chak lo zawk Halep erawh season hmasa lama final a luh tawhnaah Venus Williams hneh thei mah se a nau zawk Serena a ngam loh avangin a inkhelh thiamna hmun 'clay court' atan inbuatsaihna a nei chhunawm zawk ang.

Nimin inkhel dangah US Open champion lai Naomi Osaka chuan dinhmun hnuaihnung zawka a din hnuah Anastasija Sevastova chu 4-6, 6-3, 6-4 a hnehin a tlang a, quarterfinal-ah Elina Svitolina nen an inhmachhawn leh ang. Seeded parukna Svitolina hian US Open finalist ni tawh Madison Keys chu 6-2, 1-6, 6-1 in a lo hneh ve bawk a ni. 

Japanese nula Osaka hian a service hmasa berah point hloh loin game la thei mah se, service vawi hnihna a hloh avangin set a chan nghal a, set hnuhnung pahnihah erawh a ball vuak na leh dik thei tak chu hmang ṭangkaiin a chak let hram.

World number 4 Osaka chuan, "Ka beidawng ve ngai lo, ṭha taka an khel a nih pawhin ka theihtawp hi ka chhuah zel ṭhin. Ka tan chuan inrintawkna hi chakna thahrui pawimawh ber a ni," tiin a sawi.