Jordan lakah Vietnam an chak

Vietnam chu Asian Cup quarterfinal lut hmasa ber an ni - Pathianni zan khan Jordan nen hun pangngaiah 1-1 a an inhnehtawk hnuin penalty-ah 4-2 in an chak a, a thiam pariat zingah an invawrhkai. 

Jordan hi group stage-a Australia meuh hneha last 16 thleng an ni a, Vietnam erawh match khat chiah chak chunga discplinary record chhawr ṭangkaia last 16 lut an ni. 

Chak tura rin zawk Jordan hian minute 39-na lekah Baha' Abdelrahman hmangin goal hmahruai an khung a, mahse Vietnam tan Nguyen Cong Phuong chuan an si phurh hi a sut.

Hun pek belh hnuah pawh goal dang a lut lo a, penalty hmanga chak zawk zawn a nih hnuah Vietnam hi 4-2 in penalty hmangin an chak ta a ni. 

Pathianni zan last 16 inkhel dangah China-in Thailand lakah Supachai Jaided vangin si phur hmasa mah se Xiao Zhi leh Gao Lin penalty chhuih hmangin an chhanglet a, Marcelo Lippi kaihhruaina hnuaiah 2-1 a chakin quarterfinal an lut. 

Iran-in Oman lakah minute thumna lekah penalty chawi mah se Ahmed Al Mahaijri pet chu goalkeeper Alireza Beiranvand-a'n a dan sak a, Iran tan Alireza Jahanbakhsh leh Ashkan Dejagah (penalty) ten goal khung zuiin 2-0 in Oman an hneh a, quarterfinal an lut. Iran striker Sardar Azmoun chuan Oman-in penalty an pet dawnin Al Mahaijri petna tur lam hi a lo kawk a, a ring dik!