Fulham lakah Tottenham an vannei

Tottenham Hotspur-in Harry Kane leh Son Heung-min tel loin Pathianni zan khan Craven Cottage-ah Fulham 2-1 in an hneh a, Premier League table-ah pathumna dinhmun an sawhnghet.

Spurs hian hnehna an chang nachungin chak turin vanneihna an mamawh a, Fulham lakah ṭum dang ang angin an tlarhma a hriam lo.

English forward Kane aia lut Fernando Llorente chuan minute 17-naah an lamah a tilut a, Fulham hian first half-ah ringawt goal-ah vawi kua zet an pet avangin hma hruai an phu. Spanish forward Llorente hian Jean Michael Seri corner pet chu pet chhuah a tumna lamah a chesual a, an lamah a lut.

Spurs hian an siphurh hi second half-ah an sut a, minute 51-naah Christian Eriksen cross ball duhthusam chu Dele Alli-a'n a tauh lut. Mauricio Pochettino hote hian ball chang tam mah se Ryan Babel chuan Fulham tana a match hmasa berah Spurs tlarhnung a chhaih buai pha a, goal a khung lo nachungin a chet vel danah manager Claudio Ranieri a lawm ang.

Hun tawpah erawh chak duhna thinlung ngah zawk Spurs an vannei a, injury time minute thumnaah substitute Georges-Kevin Nkoudou cross chu Harry Winks-a'n a tauh lut a, point hlu tak an hlawh chhuak. Fulham erawh an vanduai a, first half-ah Aleksandar Mitrovic goal chu offside vangin pawm a ni lo a, Serbian forward penalty beisei chu pek a ni lo bawk.

Spurs hian point thum an hlawh chhuak a, amaherawhchu hliam vangin Dele Alli an chan belh. March thlaah Harry Kane a rawn let dawn chauh a, Son pawh South Korea tan a khelh mek avangin tlarhma lam buaina hi awlsam taka chinfel theih a ni tawh lo ang.

Tottenham manager Mauricio Pochettino chuan, "Player hi chuan an inhliam fo a, hei chu thil thleng thei a ni. Match tam laia an inhliam a nih chuan midang tan an theihna phochhuahna hun an hawn sak a ni," tiin inhliam vanga buai a tum lo.

Argentine manager chuan sawi chhunzawmin, "Lucas Moura hian training a zawm tawh a, duh chuan chhawr theih a ni tawh. Fulham nena kan la hman loh chhan chu 100% in a la fit lo a, kan la risk duh lo. Chelsea nen kan inkhelh hunah chuan starting eleven emaw bench-ah a awm tawh ang," tiin a sawi.

Tottenham hian match 23-ah point 51 an hmu mek a, pangana leh paruknaa awm Arsenal leh Manchester United aiin point sarih leka an hmuh san avangin chetsual chuan season thara Champions League khel thei lo thei dinhmunah an ding. Inhliam vanga an buai lai hian Spurs hian Carabao Cup semfinal second leg-ah Chelsea leh FA Cup-ah Crystal Palace an hmachhawn dawn a, league-ah Watford, Newcastle United leh Leicester City te nen an inkhel chhunzawm dawn a, fixtures harsa tak niin a lang lo.