Barca tan La Liga nomawi a hnai zel

Spanish champion Barce­lona-in a zawna La Liga nomawi chawi turin hmalam an pan zel a, Pathianni zan khan an mikhual Leganes chu 3-1 in an hneh. 

Catalan club tan Ousmane Dem­bele, Luis Suarez leh Lio­nel Messi ten goal khat ṭheuh an khung a, danglamna thlentu chu Messi bawk a ni. Bench aṭanga luhtir Lionel Messi luh hma hian team pahnih hi 1-1 in an inhnehtawk.

Mahse, Messi hian a luh hnu­ah Suarez goal khung tur a thawk chhuak a, injury time-ah goal khat dang a khung belh bawk - Messi hming a sang zual zel!

Barcelona hian table-ah a chung ber an luah chhunzawm zel a, anmahni hnaih bertu Atletico Madrid aiin point ngain an sang fal tawh zawk - pathumna Real Madrid aia an sanna chu point 10 a ni. 

Nou Camp-a inkhelah Bar­celona-in first half an thunun a, player hmuhnawm bera chhal ngam chu Ousmane Dembele a ni. French forward hian a ball thiamna leh tlan chakna hmangin Leganes tlarhnung a chhaih mangang a, Leganes lam hian tih theih an nei meuh lo.

Minute 12-na lekah Dem­bele tlanchakna chhawr ṭang­kaiin Barca hian hun duhawm an nei nghal a, mahse French forward hian penalty area-a ball laluta Philippe Coutinho tana a siamsak chu Coutinho hian bar chungah a pet. 

Dembele a hmuhnawm chhun­­zawm a, minute 32-naah an goal hmasa ber a khung ta nge nge - Barca defender Gerard Pique chuan Leganes player pa­­hnih a bum hnuah Jordi Alba a pe. 

Mual vei lam aṭangin Alba hian penalty area-a awm Dem­bele a zawng hmu a, Leganes goalkeeper Ivan Cuellar man rual lohin a kil sir zetah a pet goal.

Leganes hian Barcelona an hmachhawn hian kar hmasa khan Real Madrid chu Copa del Rey last 16 second leg-ah an hmachhawn a, 1-0 in an hneh. 

Mahse, inkhel hmasa zawkah 3-0 ngawta an tlawm tawh avangin Leganes hi an tlang ta chuang lo - Spanish foot­ball-a club ṭha pahnih a zawnin an tum a, Barca lakah hian an che thei meuh lo niin a lang. 

Minute 57-naah erawh bei­seina thar neiin Martin Braith­waite chuan mikhual team tan si phurh sutna goal a rawn khung a, Middlesbrough aṭanga Spanish club-a loan-a khel mek forward hi Real laka Leganes goal neihchhun khungtu tho kha a ni. 

Barca-in goal an chhuah avang­in coach Ernesto Val­verde-a'n in thlak danglam a ngai tih a hria a, goal an chhuah aṭanga minuite sarihnaah bench lama a hahdamtir Messi leh Ivan Rakitic a luhtir.

Rakitic leh Messi luh hnuah Barcelona-in hma an sawn a, beisei ang ngeiin Barca hian rei lo teah goal pawh an zawng hmu nghal - Messi shot ṭha zet chu goalkeeper Ivan Cuellar chuan mawi takin dang mah se a per lehlam nangchingtu Suarez a dang nawn thei lo. 

Suarez goal luh danah goal­keeper nen an in tauh niin a lang a, Leganes lam an lungawi lo. Mahse, VAR hmanga ennawn a nih hnuah pawh Suarez goal hi kaltlang tir a ni a, thutlukna dik niin a lang. 

Barcelona boss Valverde chuan, "Ka ngaihdanah chuan goal a ni a, mitinin ngaihdan kan nei ṭheuh. Dik taka sawi chuan VAR vangin sawiselna a bo chuang lo a, robot meuh pawhin inkhel enkawl se, an sawisel tho ang," a ti!

Catalan club tan Lionel Messi chuan hun pek belhah chak nem­nghehna goal a khung a, Jordi Alba nen mawi zeta an inpek kual hnuah a khung - hei erawh sawi­sel bo a ni a, Leganes an tlawm.

Barcelona tan chanchin lawmawm lo a awm a, Leganes laka inkhel ṭha tak Ousmane Dembele chu second half-ah a hliam vangin lakchhuah a ngai a, a ngal rekah hliam a tuar.

Dembele hi nizan khan a hliam dinhmun hi enfiah a ni a, he thu buatsaih a nih lai hian eng ang taka na nge a nih a la hriat loh - Barca fan-te chuan rei tak a chawlh loh hram an beisei ang. 

Kum 21 mi forward hian season hmasa khan Barcelona hi beiseina sang tak nen a zawm a, hliamin a tihbuai avangin match 23 a khelhah goal li chiah a khung thei. 

Tun season-ah a theihna tak tak pholangin match 27-ah goal 13 a khung tawh a, a chet ṭhat vanglai takin a inhliam leh ta - a vanduai takzet.