Zanin Asian Cup last 16 tawp zan

Asian Cup last 16-a match hnih khelh tur hma­bak la awm chu zan­in­ah khelh a ni dawn a, team inhmachhawn tur an 'len' avangin inkhel hmuh­nawm beisei ngam a ni. 

Zanin inkhel hmasa zawkah dar 6:30 hian South Korea leh Bahrain an inkhel dawn a, Taeguk Warriors (South Korea sawina) lamin Son Heung-min an neih thar avangin an phur thar a, Bahrain hian duh thlang thei nise South Korea an thlan a rinawm loh. 

South Korea hian group stage match-ah Chi­na, Kyrgyzstan leh Phi­lippines hneh vekin last 16 hi an lut a, match tawp bera China an hmachhawn ṭumin Son a inlan ve chiah - 2-1 a an chakna inkhelah goal hnih hi a thawhrah ve ve a ni nghal.

Tottenham Hotspur forward hi Premier Lea­gue-ah meuh pawh defen­der-te tan mangchhia a ni a, Bahrain tlarhnung tan chuan ani dang tura in zir uluk hi a ṭul khawp ang. 

Bahrain erawh match thuma point li nei chunga last 16 lut an ni a, dah san viau an harsa - South Korea lakah hian an chak a nih chuan result beisei loh zingah chhiar tel a ni ang.

Zanin dar 9:30-ah Qatar leh Iraq an inhma­chhawn dawn bawk a, an inngam tawk khawpin a rinawm. 

Qatar hi an 'form' rem rem hle. Group Stage-ah Saudi Arabia, Lebanon leh North Korea hneh vekin goal 10 an khung a, an lamah goal a lut miah lo - Almoez Ali chu Iraq tan ven bik tur an ni. 

Kum 22 mi forward hian goal sarih ngawt khung tawhin top scorer a ni mek a, North Korea lakah phei chuan goal li ngawt a khung!

Iraq-in Qatar an hlau bik lo ang. Group harsa takah Vietnam leh Yemen an hneh hnuin Iran an inhnehtawkpui a, Qatar laka tlawm mai turin an inphalin a rinawm loh.