Malaysia Masters champion Son Wan

South Korea tlangval badminton khel thiam Son Wan Ho chuan Pathianni khan Olympic champion Chen Long hnehin, 2019 Malaysia Masters badminton tournament-ah a champion. 

Son-a hian Chinese shuttler Chen hi 21-17, 21-19 in a hneh, Chen-a'n a tir lamah hma hruai zawk mah se game la loin a tlawm - ama tihsual vanga a khingui point a pek ṭhin chu a chak loh chhan langsar tak a ni. 

Seeded palina Son chuan, "Chen Long te ang player ṭha kan hma­chhawn a nih chuan inkhel awlsam hi beisei chi a ni lo. Ani nen hian kan intawng fo tawh a, mahse final boruak hi chu a danglam bik a ni," tiin a sawi. Son hian lawmman atan Rs 18,73,331 a dawng.

Hmeichhe singles fi­nal-ah Rat­chanok Intanon chuan Carolina Marin 21-9, 22-20 a hnehin a champion bawk. Indian shuttler chhuan­vawr Saina Nehwal hnehtu Marin hian bul a ṭan fuh lo a, game hnu­hnung zawkah pawh hnufualin a zawnin point sarih hmu thei mah se a pawtthla zo chuang lo.

Thailand shuttler Rat­chanok chuan, "Nuam ti taka inkhelh ka tum a, boruak rit leh harsa insiam chawp kha ka duh lo. Marin ṭhat zia hre reng chungin nuam ti takin ka khel lui a, ka hlawhtlin phah," tiin a sawi.

Men's doubles huang­ah world number one pair Marcus Fernaldi Gideon leh Kevin Sanjaya Sukamuljo te chuan 21-15, 21-16 in Malaysian duo Ong Yew Sin leh Teo Ee Yi te ṭangdun hnehin title an la bawk.