Match 149 hnuah Acerbi hnawt chhuak

Lazio defender Francesco Acerbi chu a zawna Serie A match 149 a khelh niah hnawhchhuah a ni a, Italian league sang bera inlan zawn rei record chelhtu Javier Zanetti (162) umphak a tumna chu a thlawn  rih dawn ta a ni.

Pathianni zan inkhelah Napoli chuan an hnuaia awm Lazio chu 2-1 in an hneh, he inkhelah hian minute 70-naah kum 30 mi Acerbi hi luhtir chauh ni mah se yellow card vawi hnih a hmuh hman avangin hnawhchhuah a ni a, match khat chhung hremna a hmachhawn ang.

Argentina international defender hlui Zanetti khan 1995-2014 chhung khan Inter Milan tan chawl miah loin league match a khel thei a, tun hnaia khel hnem dang Acerbi pawh hi 18 October 2015 aṭanga Pathianni zan thleng khan league match bikah chuan a inlan kim vek a ni.

Twitter hmangin Acerbi chuan pawi a tih thu tarlangin, "Hun harsa tak kan tawh laia ka ṭhiante kim lo chunga khel tura ka chhuahsan kha pawi ka ti hle, 2-1 a hnufual laia hnawhchhuah nih chu a hrehawm takzet," tiin a sawi.

Lazio coach Simone Inzaghi erawhin a player chu hnawhchhuah tur nia a hriat loh thu a sawi ve thung, "Acerbi khan ball a khawih fuh ngei a, ka hmuh dan chuan a tih tur dik tak a ti zawk," a ti.

Hnehna changtu Napoli-in league match 20 an khelh aṭangin point 47 an hmu a, champion lai leh hmahruaitu ni bawk Juventus an phak lohna chu point ruk a ni - Juve hian nizan khan Chievo an hmachhawn a, an result a zirin an inkar hi a la danglam thei. Lazio erawh point 32 chauh an la neih avangin pangana an ni mek.