Champion lai a tla ta

Australian Open champion lai Roger Federer chu Stefanos Tsitsipas hneh loin last 16-ah vuak tlak a ni. Mipa singles player inlan zinga upa ber Federer (37) a chak loh lai hian, a la dam zinga naupang ber Stefanos Tsitsipas (20) chuan a vawi khat nan Grand Slam-ah quarterfinal a khel thung dawn.

Pathianni zan Rod Laver Arena-a inkhelah Tsitsipas hian darkar thum leh minute 45 chhungin 6-7 (11-13), 7-6 (7-3), 7-5, 7-6 (7-5) in hnehna a chang, a naupan lai aṭanga a player ngaihsan em em a hneh hnuah, "Tunah hian mihring zinga hlim ber ka ni," ti hialin a hun tawn chungchang a sawi chhuak.

Federer-a'n professional tennis a khelh ṭan tirh khan a khingpui Tsitsipas hi a la piang lo, tunah erawh court chhungah an inkhel dun leh der tawh. Swiss star hian Melbourne Park-ah hian kum 16 chhungin vawi hnih chiah quarterfinal thlen phak loh a nei.

Kum 20 mi Tsitsipas hian tawnhriat la ngah lo mah se a huaisen, a khingpuiin break point vawi 12 a hmuh zawng zawng a inchhanhim thei vek! Set lina an khelh laia 'Match Point' a hmuh pawh khan Federer hian a lehthal theih rinna a la sang hle.

Mahse, Greek tlangval hi a zam duh bik lo, point hnuhnung ber hmu tur hian a service hmasa chu a vaw out phawt. A service vawi hnihnaah pawh na thawkhat taka vuain Federer tan backhand turin a vua, ball rawn let pawh a ngai lamah bawk pe letin a vawi hnihnaah tawnhriat ngah Federer-a'n a tihsual phah a ni.

Seeded 14-na Tsitsipas hian vawiin chawhma lamah Roberto Bautista Agut a hmachhawn leh dawn. Agut hian a match hmasa bera Andy Murray a hneh bakah, quarterfinal lut tur hian seeded pangana Marin Cilic chu 6-7 (6), 6-3, 6-2, 4-6, 6-4 in a hneh.

Grand Slam vawi 20 champion tawh Federer-a'n mipa player zinga Australian Open vawi sarih champion thei hmasa ber a nih tumna a thlawn rih a, tennis a khelh hun chhunga nomawi 100 lak tlin a tumna chu a la tlin thei rih lo bawk.

Tun hnai season hnuhnung pahniha a inlan lohna 'Clay Court' ah Federer hian inkhelh a tum thu a sawi. Swiss star chuan, "Hliam leh harsatna dang vanga season hnih ka inlan loh hun chhung khan ka lung a leng a, nuam ti taka khelh leh ka duh," tiin a sawi.

A chak loh dan thlir letin Federer chuan, "Set hnihna kha ka la ngei dawn niin ka ngai hman, mahse Hopman Cup ang bawkin a service ka chhuhsak thei tlat lo, thil eng emaw fuh tawk lo chu a awm a ni, chutih rualin ani khan a khel ṭha em em thung si a ni," a ti.

Player beisei awm Alexander Zverev tan Grand Slam nomawi chawina kawng a inhawng thei rih lo. German tlangval hi nimin khan Milos Raonic lakah 6-1, 6-1, 7-6 (7-5) in a chak lo; Australian Open bika a thlen san ber chu last 16 a ni ta rih.

Kum 21 mi Zverev hi seeded palina niin, season hmasa tawpna tournament ATP Finals champion a nih avangin tun ṭumah pawh hian rinkai a ni phak. Mahse, set khatna a hloh hnuah a thinrim a insum zo lo a, racquet a vuak chhiat laiin a khingpui Raonic erawh 'cool' takin a awm - Zverev hian dinhmun hniam zawka awm hnua thawh chhuah dan a thiam a ngai.

Seeded 16-na Raonic chuan, "Hlauthawng thei ang bera awmtir kha ka tum a ni a, ka ti hlawhtling," tiin a chak chhan a sawi. Canadian tlangval hian a match lehpekah chuan Borna Coric leh Lucas Pouille te inkhela chak zawk a hmachhaawn leh dawn.