Pro Fight-ah Mizo boxer 380

Tualchhung boxing inelna ngaihhlut Zothan Autoworks LPS Pro Fight khelh hun a hnai a, tualchhung boxer tan bik tel tuma inziahluhna hun a tawp tawh - boxer 380 zetin hming an pe lut.

Pro Fight vawi riatna hi nikum kum tawp lama neih tura tih kha a ni a, inthlanpui vangin a hun sawn a ni. Inelna  atan hian India hmar chhak state dangte sawm an ni a. Manipur, Assam, Meghalaya aṭangin weight hrang pangaah boxer pakhat ṭheuh tel thei tura tih an ni a, tel tur zat chiah hriat ni rih lo mah se state pathum hian an boxer ṭha tirh chhuah ngei erawh an tum tih organising committee an hriattir tawh a ni.

Mizoram Boxing Asso-ciation secretary general leh Boxing Federation of India joint secretary Lalrozama chuan state dang pali - Nagaland, Tripura, Sikkim leh Arunachal Pradesh a dawr mek. Anni hian weight hrang panga aṭangin an neih ṭhatnaah boxer pahnih ṭheuh an tir thei dawn. MIZBA chuan state dang aṭanga boxer lo kalte hi an buaipui ang a, sum leh pai senso erawh organising committee-in a tum vek ang.

Inelna hi February 5 aṭanga neih tur niin January 31 hian Hawla Indoor Stadium, Republic Vengthlangah tel tumte chu inbuk leh medical test neih tur a ni a, hetah hian hmar chhak state dang aṭanga tel turte a hriatchian theih nghal bawk ang. Pro Fight-ah hian weight tina champion ten Rs 50,000 an dawng dawn a, inelna hnuhnung zawk aiin lawmman pumpui punna hi 18.92% a ni.