Mourinho - Pa ngaihnawm a la ni reng

Qatar tv channel beIN SPORTS-in Jose Mourinho an thlem thluk theih avangin Portuguese manager chanchin leh ngaihdan ngaihnawm tak tak kan hriat belh zel a, Manchester United ban zawh hlim manager hian club pathum chu a hnar leh der tawh.

Kum 55 mi Mourinho hi Inrinni zana Arsenal leh a club hlui Chelsea inkhelh laiin beIN SPORTS-ah hian a inlan leh a, a ze ngai chhuah lehin khel zui theih tur ngaihdan a nei leh nual. Portuguese manager hi ṭum hnih a ṭhu a, match hnih lek aṭanga a sum hlawh chu £120,000 chuang a ni a, India pawisa chuan vaibelchhe khat (nuai 100) a chuang daih a ni.

Jose Mourinho hi uchuak taka goal venhim hna thawk ṭhin tiin sawi lar a ni a, chumi sawifiah nan chuan 'bus a park' an ti mai ṭhin. Amaherawhchu Portuguese manager hian an sawi dan leh a tak taka thil thleng chu a dang daih thu a sawi.

Mourinho chuan, "Bus park tia min sawi ṭanna hi an hria em? Real Madrid ka champion pui ṭum kha a ni a, point 100 kan hmu a, kan goal khung zat pawh record a ni," tiin chhuang takin a chanchin a sawi. 

Real Madrid hian Mourinho hnuaiah hian 2011-12 season khan La Liga-ah point 100 hmuin an champion a, Barcelona aiin point kuain an hmu tam. Goal khung kawngah tun thlenga La Liga record siamin goal 121 tehmeuh an khung.

Portuguese manager chuan, "Goal khung tam kawnga Spanish football record hi Barcelona siam a ni lo, Real Madrid siam zawk a ni. An record chu defensive khel ṭhin coach hnuaia an siam a ni," tiin goal khung a hlamchhiah ngai loh thu a sawi.

Mourinho chuan, "Real Madrid ka enkawl tirh khan chak dan an theinghilh tawh a, Cup final kan thleng a, Barcelona kan hneh. Hemi hnuah league-ah kan champion zui a, Real Madrid hian kum 10 chhungin league nomawi pahnih an chawi chauh a ni," tiin Barcelona ropui vanglai taka nomawi an chawi thu a sawi.

Jose Mourinho hian Manchester United a enkawl chhungin Europa League leh League Cup nomawi a chawi pui hman a, league-ah erawh Manchester City a tluk lo a, a ban meuh chuan Liverpool a tluk tawh lo viau bawk.

Portuguese manager chuan, "Guardiola hian Man City a enkawl hmasak ber season-ah a champion lo. Season hnihna erawh Pep hian thutlukna huaisen tak a siam a, club lamin an thlawp bawk. Hemi ṭum hian full back pali an hralh a, defender pali tho an lalut. Liverpool hi han thlir ila, Jurgen Klopp-a awm hmain tuna an player hi eng zat nge awm? Manager nih chuan kan duh dan anga khel thei player an ngai. Kei erawh chuan ka duh danin ka ti ve thei lo," tiin a elpui Pep Guardiola leh Jurgen Klopp te angin thlawptu a neih ṭhat loh thu a sawi.

Mourinho hian United a enkawl laiin pound maktaduai 400 vel zet player lei nan a hmang a, chung zingah chuan a hun laia world record transfer Paul Pogba (£89m) leh Romelu Lukaku (£75m) te pawh an tel a ni. Amaherawhchu tun season ṭantirh khan Mourinho hian defender a duh belh a, United-in an lei sak lo.

Manchester United pawhin club board leh management team te an inpawh ṭhat zawk nan director of football an la dawn hnai a, manager-in thuneihna zawng zawng an keng kawh reng dawn lo niin a lang.

Hemi chungchang hi sawiin Mourinho chuan, "Club khata manager thu ber hun chu a tawp dawn niin ka hria. Club min rawn dawr tute nena kan inbiak pawhin ka player lei duh ka sawi lo a, an club budget kan sawi lo a, an kalphung zawk kan sawi," tiin a sawi.

Portugese manager chuan, "Club pathum min dawrtu chu an club kalphung leh ka duh dan a inrem loa ka hriat avangin ka hnar tawh a ni," tiin sawmtu a neih thu a sawi lang.

Jose Mourinho hi pa danglam tak a ni a, pawisak pawh a neiin a lang lo. Portuguese manager hian chak duhna thinlung a put avangin thil mak sak tak tak a ti ṭhin a, tun ṭumah pawh a chet tawh dan a inpuang.

Kum 2005 khan Chelsea a enkawl laiin Champions League quarterfinal-a Bayern Munich an hmachhawn hmain match hnih team te bula awm thei lo tura hrem a ni.

Mourinho chuan, "Player bula awm ka duh a, ka tihlawhtling. Zan dar 7:00 a inkhelh tur a ni a, player-te an thlen laia dressing room-a awm ka duh avangin chhun aṭangin ka lo awm lawk a, tumahin min hmu lo. A buai thlak lai ber chu a chhuah lam kha a ni a, kan kit man (thawmhnaw enkawltu) chuan bawmah min khung a, ka thawk theih nan tlem a ti kaw bawk.

"Amaherawhchu UEFA lam aiawh chu dressing room pawna a awm avangin a ti phui vek a, ka thaw thei lo. A hnua bawm a rawn hawn chuan thaw chhamin ka thi lo chauh a ni," tiin hremna an pumpelh dan a sawi chhuak.