Europe roreltu Liverpo4L

Liverpool nomawi hunnaah hmun ruak siam belh a ngai -  Istanbul khawpui aṭangin Nilaini zan khan a vawi li nan UEFA Super Cup an hawn belh tlat!

Champions League nomawi an chawi hnuah Liverpool-in Europa League champion Chelsea an hneh a, Europe roreltu an ni tih an pholang. Premier League club pahnih hi minute 120 chhungin 2-2 in an inhnehtawk a, penalty hmanga chak zawk zawn a nih hnuah 5-4 in Reds an chak. 

Liverpool tan Adrian chu a changtupa a ni a, Spanish keeper-in Tammy Abraham penalty pet a dan chu Liverpool chakna a ni. 

Manchester United laka 4-0 a an mualpho ṭuma Chelsea tana bul ṭan thei lo N'Golo Kante chuan Blues tan inkhel bul a ṭan a, midfield-ah Mateo Kovacic leh Jorginho nena inkawpin ro an rel. 

Reds an talbuai a, Klopp-a'n starting XI a thlan danah a tifuh tawk lo niin a lang bawk. Minute 36-naah Chelsea-in goal an khung ta nge nge a, Olivier Giroud-a'n Frank Lampard hnenah Abraham aia thlan zawk tur a nih thu 'striker goal' hmangin a pholang.   

Blues tan Kante a lansarh chhunzawm a, Chelsea tana competitive match-a a vawi khat nana bul ṭan Christian Pulisic chu Liverpool tlarhnung lam tan hnawksak a tling bawk. Mahse, Liverpool player-ten chawlhlawkah thu ṭha an ngaithla tih a hriat a, Sadio Mane chuan second half ṭan aṭanga minute thumna lekah an si phurh a rawn sut. 

Hun tawp thleng goal dang a lut lo. Chutihrualin Blues an vanduai, first half-ah Pulisic goal ṭha zet chu offside vangin pawm a ni lo a, hun tawp hmain Mason Mount-a finishing tawih zet chu offside vang bawkin pawm sak a ni lo. Extra time khelh a ṭul phah. 

Klopp-a'n inkhel ṭantir lamah Alex Oxlade-Chamberlain chu midfield-ah dah loin rin loh takin tlarhmaah bul a ṭan tir a, Mane leh Mohamed Salah nen an inkawp. 

German coach-in a tih fuh loh a hre chhuak thuai a, Ox aiah Roberto Firmino a luhtir. Brazilian forward hian second half-ah Mane khung tur a siamsak nghal a, extra time-a Mane goal khung pawh a siamsak bawk a ni. Liverpool hi chak tlang mai tura ngaih tawh an ni a, mahse inkhel an thunun thei bik lo. Minute 101-naah Adrian-a'n a tih tluk vangin Abraham chuan penalty a rawn hlawh chhuak a, Jorginho-a'n khung turin harsatna a nei lo. 

Team pahnih player an chau a, ball in pass sual a tam em em bawk - goal dang a lut tawh lo a, penalty-a chak zawk zawn a nih hnuah Liverpool an vannei.