Bundesliga Zaninah champion Bayern inlan nghal dawn

Germany football inelna sang ber Bundesliga chu zanin aṭang hian khelh ṭan a ni leh tawh dawn, champion lai Bayern Munich chuan league khuhhawn nan zanin dar 12:00 hian Allianz Arena-ah Hertha BSC an mikhual ang.

Season hmasa khan match hnuhnung ber an khelh ni thlengin champion tur a chiang lo, a tawpah Bayern hi an elpui Borussia Dortmund aiin point hnih chauhin an sang zawk. Vawi khat chetsual zauh pawizia an hrechiang ang; kumin match hmasa ber aṭang hian thapui an thawh nghal a rinawm.

Franck Ribery leh Arjen Robben te hun a liam a, defender rinrawl Mats Hummels chu Dortmund lamah a kir bawk. Bayern hian an senior player pawimawh pathum tel loin season an hmang dawn - an hmunruak luahkhah a har dawn, a hma aia ṭha zawkin an khel thei thung bawk.

Tlarhma sir lama khel tur chuan Serge Gnabry leh Kingsley Coman te an nei a, Gnabry hi season hmasa lama an club player of the year ni thei kha a ni. Inter Milan aṭangin Ivan Perisic an lalut bawk. Croatia international winger hi match hmasa lamah chuan minute 90 chhung a inkhelh a la rinawm loh.

Hummels awm tawh lo mah se France international defender pahnih Lucas Hernandez leh Benjamin Pavard te an neih avangin buaina a awm lo tura ngaih a ni. Amaherawhchu, an defender thar pahnih hi mual sira khel chi an nih avangin manager Niko Kovac-a'n eng tiangin nge a siamrem dawn hriat a la ni lo. 

Bayern president Uli Hoeness chuan, "Germany chauh ni loin, European team ṭha nih leh kan tum," a ti. League leh Cup inelna chauh ni loin Champions League nomawi chawi chu an thupui pakhat a ni dawn.

Thlasik chawlh hman zawh hnuah Dortmund hian point kua ngawta an san falna an hum thei lo a, season hmasa lama an chet dan aṭangin zirlai tam tak an zir chhuak ngei ang. Lucien Favre naute hian German Supercup-ah Bayern an hneh avangin inrintawkna an nei sang bawk.

Defender Mats Hummels, Thorgan Hazard, Nico Schulz leh Julian Brandt te an neih belh a, tawnhriat ngah Marco Reus leh Paco Alcacer te an rintlak bakah Jadon Sancho chu player hmuhnawm berte zinga mi ni tura ngaih a ni.

Favre-a enkawl Dortmund hian Inrinni zanah Augsburg an mikhual dawn, champion an duh a nih chuan an match hmasa ber aṭanga point thum hmuh nghal a pawimawh ang.