I Day Football Champion Electric Veng

NEXA Independence Day Celebration Football Tournament-ah Electric Veng FC-in FC Venghnuai 2-1 a hnehin an champion.

Electric Veng FC hian an club kum 25 tlinah chiah a vawi khat nan I Day Football nomawi an chawi. Coach Lalsangzuala Hmar a ropui a, a kalna apiangah nomawiin a zui. Melthum pa Sanga hian a zawnin I Day Football nomawi vawi thum a chawi a, Electric Veng hma hian Chhinga Veng FC vawi hnih a champion pui a ni.

FC Venghnuai tan goal thum khung tawh Vanlalthanga'n bul a ṭan a, captain Isak Vanlalpeka nen tlarhmaah hmun pawimawh an chang. Defence laiah I Day Football final boruak tem tawh Lalruatfela leh Lalmuanawma te an awm a, lu tuam chungin keeper number 1 RS Lallawmzuala a inlan.

Electric Veng FC tan Salem Veng tlangval David Lalchhuanawma chu hma tawngah a awm a, freekick specialist Jacob Lal­rawng­bawla'n a thlawp. Mual sir aṭanga goal nawr turin Lalrammawia leh Ramhlun­chhunga te an awm.

EFC tlarhnung pali chu season liam ta aṭanga inkawp tawh C. Zomuanpuia, Vanlalremruata, Rorelliana leh C. Lalnunmawia te an ni. Goalkeeper-ah an lak thar Lalmuansanga chu khelhna hun pek a ni.

Ground ball-a naute khelhtir ṭhin coach pahnih Lalsangzuala Hmar leh Rindika Hmar te an inhmachhawn a, ruahsur vanga ground a nal bawk avangin game rang leh hmuhnawm an chhawp chhuak.

First half-ah hian goal chance ṭha bik erawh pakhat chauh a awm a, Venghnuai player VL Thanga'n ṭha zeta a lakluh hnuah a ke veilamin kawh zetin a pet a, keeper Muansanga'n a dang ṭha hle. Venghnuai an khel ṭha hret a, EFC tlarhnung tan VL Thanga a hnawksak. Team pahnih keeper Muansanga leh Lawma te an khel ṭha hle.

Second half-ah ruah a sur lo a, inkhel entute thawm a ṭha bawk nen inkhel a hmuhnawm zel. 

Minute 78-naah VL Thanga corner pet chu David Lalchhuanawm'n an mahni lamah a tauh goal palh a, Veng­hnuai thâwm a ṭha takzet. Amaherawhchu, MPL kai thar tawnhriat neih loh a lang a, hmun hlauhawmah freekick an chawi. Minute 82-naah EFC midfielder Jacob-a'n petin Venghnuai tlarhnung talbuai karah David-a'n pet chu keeper Lawma'n dang mah se a per chu Chhunga'n chiang zetin a pet goal.

Minute 85-naah ho zetin Venghnuaiin corner an chawi leh a, Jacob-a ball pet thiamna lang lehin ven loa Chhunga'n chakna goal a khung. Venghnuaiin goal hnih an chhuah hnuah nawr leh mah se Electric Veng FC tlarhnung an ṭang tluana Sanga hote an champion.

Electric Veng FC coach Lalsangzuala Hmar chuan‚ "Kan ṭawngṭai nasa, ṭawngṭai rah a ni. Kan ṭawngṭai hian tih tak zetin kan ṭawngṭai a, chu chuan inrintawkna nasa tak min pe," tiin Vanglaini a hrilh. Final-ah hian team pahnih supporter-te hnuhnawm khawpin an che a, an thawm hriat a nuam bawk.

I Day Football - Thlirna Tawi

Champion    Rs 1,00,000    Electric Veng FC

Pahnihna    Rs 50,000    FC Venghnuai

Semifinalist    Rs 10,000    Aizawl FC

        Chhinga Veng FC

Fairplay Award    Rs 10,000    FC Venghnuai

Mimal Lawmman (Rs 2,500 ṭheuh)

Best Goalkeeper    RS Lallawmzuala, FC Venghnuai

Best Defender    Rorelliana, Electric Veng FC

Best Midfielder    Jacob Lalrawngbawla, Electric Veng FC

Best Forward    Vanlalthanga, FC Venghnuai

Champion Kalkawng

 ELECTRIC VENG

Group Stage

August 5, Thawhṭanni

Electric Veng FC    3 - 1    Chanmari FC

EFC : David Lalchhuanawma 11'; Jacob Lalrawngbawla 38'; Lalengmawia 85'

CFC : Lalnunzama 50'

August 7, Nilaini

Aizawl FC    0 - 0    Electric Veng FC

August 9, Zirtawpni

Electric Veng FC    1 - 2    Mizoram Police FC

EFC : Jacob Lalrawngbawla 20'

MPFC : F Lalrinpuia 80'; Lalrinzuala Khiangte 83'

Semifinal - August 13, Thawhlehni

Chhinga veng FC    0 - 1    Electric Veng FC 

EFC : Jacob Lalrawngbawla 39'

Final - August 15, Ningani

FC Venghnuai    1 - 2    Electric Veng FC 

VEH : David Lalchhuanawma (OG) 78'

EFC : Ramhlunchhunga 82', 85'