Khelo India Youth Games Mizoram U21 mipa football team tan GOLD

Mizoram Under 21 football team-in Khelo India Youth Games-ah gold medal an la a, Inrinni zan final-ah Kerala nen hun pangngaiah 0-0 a inhnehtawkin penalty shootout-ah 4-3 in an chak.

Mizoram manager Hmingthansanga chuan, "A tawpah Pathian rinchhan lo thei lo leh, Amah leh Amah a ropuina inpuang chhuakin hnehna kan chang a. Pathian malsawmna vang liau liau a champion kan ni," tiin gold medal an lak danah inchhuang thei an nih loh thu Vanglaini a hrilh.

Mizoram hian group stage-ah an khingpui Maharashtra (3-0), Chandigarh (4-1) leh Kerala (3-1) in an hneh a, an group-a anmahni hnaih bertu Kerala hian team dang pahnih ang thoa point hnih chauh an hmuh avangin Chawngthansanga kaihhruai team hi an ṭha ber tih a chiang.

Semifinal-ah Mizoram hian Goa lakah goal khung lo mah se inkhel an thunun tluan a, penalty shootout-ah an chak hram.

Group stage-a an hneh tawh Kerala-in Punjab chu penalty shootout hmanga an hneh ve bawk avangin Mizoram tan gold a hnai sawtah a ngaih theih bawk.

Final hi ISL club Pune City FC khelmual Balewadi Complex-ah khelh a ni a, Khelo India Youth Games-a   discipline hrang hranga infiammi ten Mizoram Under 21 mipa football team hi an ṭawiawm a, amaherawhchu an beisei ang ngawtin goal a lut awlsam lo.

Team ṭha ber tiha chhal Mizoram team chuan inkhel thunun mah se goal an khung thei lo. Captain Lalmawizuala'n keeper chiah ṭum hnih a hmachhawn hnuah goal a khung lo ve ve a, Lalruatfela leh David Laltlansanga te pawhin Kerala keeper an paltlang thei bik lo.

Keeper nen chiaha inhmachhawn ṭum li bakah hian goal khung theihna tur chance ṭha pangngai ṭum 10 vel zet Mizoram hian an hlah bawk a, team ṭha zawk an nih avangin an chungah pressure a tam tulh tulh bawk. 

Kerala erawhin goal venhim hna an thawk a, hun tawp lamah counter attack hmangin half chance ṭum hnih an nei tih loh chu goal chance an nei lo.

Semifinal-ah team pahnih hi penalty hmangin an chak ve ve a, Mizoramin pet hmasak an thlang. 

Aizawl FC Junior team forward PC Lalhriatpuia rawn pen chhuakin Kerala keeper-in a dan sak.

Mizoram tana pettu dang Lalnunzama, Vanlalnghenga leh Lalmuanawma (Munez) ten pet goal vek mah se Kerala lamin an pet goal ve zel avangin an dinhmun a derthawng zel. 

Electric Veng FC goalkeeper Lalrinnunga chu chhandamtu niin Kerala penalty hnuhnung pahnih chu ṭha takin a dang ve ve a, hemi inkarah hian captain Mawizuala'n khung bawkin Mizoramin hnehna an chang.

Penalty boruak a sang a, training-naa zir theih bak a ni tawh. Mizoramin awlsam takin hnehna chang se gold medal hlutna an hrethiam lo thei a, amaherawhchu an chak dan an thlir let chuan gold medal hlut zia an man thiam ang.

Mizoramin beisei ngam loh hnuah hnehna an chang a, field laiah team pumpui chu ṭhingṭhi kualin Pathian an fak. Manager Hmingthansanga chu team kaihhruaitu niin 'Lalpa ropui ber rawh se' tiin a au a, player leh coaching staff dangin 'Halleluiah, Amen' tiin an chhawn a; hemi hnu hian 'Hnehna chu Lalpa ta a ni' ti lehin 'Halleluiah, Amen' tiin a awrawl tawpin an au leh bawk.

Hmingsanga chuan, "Kan theihtawpin kan khel a, kan game khelh dan pawh a ṭha tluan fu a, an defensive lutuk avangin kan su hawng hlei thei lo a, chutih rual chuan clear chance vawi tam tak kan insiam thei. Nidanga kan goal thun thei 'ke hmui' te kha an ke a hmui hlei thei lo a. Kan nau ten an khel ṭha hle. Kan theihtawpa kan beih hnuah, mihring lam aṭanga ngaihtuah chuan kan tih theih zawng zawng kan ti a, a bak chu Pathian hnathawh a ni," tiin an champion dan a sawi.

Team chhung boruak a ṭha a, player-te leh coaching staff pawh an inpawh hle. Inkhelh banah player-te'n coach Chawngthansanga an vawr a, Mizoram champion puitu coach hian he chawimawina hi a phu a ni.

Mizoram coach Chawnga chuan, "Final hmuhnawm tak min hmuhtir avangin player-te kan chhuang hle. Hun pangngaia goal kan khung theih loh avangin kan vanduai turah a ngaih theih a, amaherawhchu engkim hi Pathian remruat vek a ni. Pathian lo ropui ber se," tiin Vanglaini a hrilh a,  MFA leh SYS chungah lawmthu a sawi bawk.

Mizoram team hian nikum khan Khelo India Under 17-ah gold an la a, kuminah erawh match hmasa bera an vanduai avangin goal difference hmangin an tla. Amaherawhchu Mizoram Under 21 mipa team-in gold medal an la ta tho.

Mizoram team hi Krismas leh Kumthar lai pawha camp neia inbuatsaih an ni a, an thawhrim rah an seng.