Chelh din rual loh Liverpool

Crystal Palace lakah Liverpool ṭantute thin phu rang fo mah se champion 'zia' an chhuah chhunzawm zel a, Anfield-a si thum ngawt an chhuah zanah pawh 4-3 in hnehna an chang. 

Liverpool tan Mohamed Salah chuan goal hnih khungin Roberto Firmino leh Sadio Mane ten goal khat ve ve an khung bawk a, Palace tana Andros Townsend, Max Meyer leh James Tomkins-te goal khungin awmzia a nei lo. 

Inrinni zana Liverpool-in Palace an mikhual hma kha chuan Anfield-ah Reds hian tun season chhungin goal thum chiah an la chhuah - mahse he record duhawm tak hi team 'tenau' Palace-in inthlahrun phah nan an hmang lo. 

Reds-in inkhel an thunun zawk chungin Townsend chuan an hun ṭha neih hmasak berah Wilfried Zaha siamsak chu goal-ah a chantir a, Liverpool an hawihai. 

First half-a Palace tlar hnung ṭhiat thei lo Liverpool-in chawlhlawk an hmang ṭangkai a, Jurgen Klopp-a'n thu ṭha a hrilh ngei niin a lang - second half ṭan aṭanga minute khatna lekah Salah chuan si phurh a rawn sut. 

Liverpool an phur lak-lawh. An si phurh sutna minute tam pawh a liam hmain Roberto Firmino chuan a hun ṭha neih goal khung nan a hmang a, Reds-in 2-1 in hma an hruai. 

Manchester City hneh tawhtu Palace beiseina a chuai lo - ven loha awm Tomkins chuan minute 65-naah si phurh a rawn sut ve leh a, Liverpool fan-te hmelah thlaphanna hmuh tur a awm. 

Mahse, Liverpool-in Palace neih loh an nei a, 'The Fab Three' tia hminglem an pek Salah, Firmino leh Mane te an hlauhawm reng.

Salah hian minute 75-naah Palace goalkeeper Julian Speroni tihsual nangchingin Premier League-a a goal 50-na a khung - Egyptian forward hian Chelsea tan match 13-ah league goal hnih a khung a, goal 48 dang hi Liverpool tan league match 59 aṭanga a khung a ni.

Minute 89-naah yellow card pahnih vangin James Milner hnawhchhuah ni mah se Reds-in Mane hmanga goal an khung leh hram avangin Palace tan injury time-a Meyer goal khungin awmzia a nei phak lo a, 4-3 in Liverpool an chak.

Liverpool-in hnehna an chan avangin Premier League match 23 aṭangin point 60 an nei tawh a, Manchester City (2017-18) leh Chelsea (2005-06) te chiah Premier League-a match 23 hnua hei aia tam point nei thei an ni - he season-ah hian an champion ve ve. 

Reds manager Jurgen Klopp chuan, "Result pawimawh tak a ni a, point 60 kan nei hi a ropui hle. Number pawimawh tak a ni a, ka naute ka chhuang takzet a ni," tiin a hlim hle.