Pacquiao a la chuai lo Mayweather a cho nghal

Boxing legend Manny Pacquiao chuan kum tam tawh mah se a la chuai lo tih pholang nawnin WBA world welterweight title a kawl lai a humhim - nimin zing khan Adrian Broner chu unanimous point-in a hneh.

Las Vegas khawpuia inhnekah Pacman hi judge pathumin chak zawkah ngai vekin 117-111, 116-112, 116-112-in hnehna an chantir a, ani aia kum 11 zeta upa lakah American boxer Broner-a'n tih theih a nei lo a ni ber.

Pacman hian vawi 70 inhnek a hmachhawnna niin vawi 61 hnehna a channa a ni nghal bawk a, vawi sarih tlawmin vawi hnih chu a khingpui a inhnehtawk pui a ni.

Kum 40-a tlin hnua a inhnek leh hmasak bera hnehna changtu Pacquiao chuan kum 2015-a a hneh loh tawh Mayweather a cho nawn leh a, "Ring chhunga rawn kir turin hrilh ula, ka lo hmachhawn ang e.

"Floyd Mayweather hian lo kir leh a duh phawt chuan hmachhawn turin ka inpeih a ni," a ti a, mipui zing aṭanga he inhnek entu Mayweather chu 'rematch' chungchang hi zawh ni mah se a chhang lo.