Sevilla ngamtu Real an sang zel

Real Madrid-in season thara Champions League khelh an tumna kawngah hma an sawn ve zel a, an elpui Sevilla chu 2-0 a hnehin table-ah pathumnaah an invawrhkai. 

Inrinni zana team pahnih inhmachhawn hma hian point 33 ve ve an nei a, an intawn hmasakah Sevilla hi 3-0 a an lo chak tawh bawk avangin head-to-head a dinhmun ṭha zawk Sevilla chu pathumnaah an awm. 

Mahse, Real Madrid-in Sevillla an inhneh nawn tir duh lo. Minute 78 hnu lamah goal hnih khungin an chak a, an dinhmun a ṭha sawt ta hle.

Real chak zanah Atletico Madrid-in hnehna an chang ve bawk a, an mikhual SD Huesca chu 3-0 a hnehin Barcelona an hnaih zel - Barca hi nizan khan an inkhel a, he thu buatsaih a nih lai hian result kan hre hman lo. 

Kum 1993 hnu lamah Real Madrid leh Sevilla an la inhneh­tawk ngai lo a, mahse Inrinni zanah inkhel thununtu Real-in goal an khung theih miau loh avangin kum 26 hnuah a vawi khat team pahnih hi an inhnehtawk dawn niin a lang. 

Mahse, hun tawp nan mi­nute 12 vel chauh a awm tawh tihin Real an inlar a, Casemiro chuan hla veh vawh aṭangin goal hmahruai a khung - Sevilla an hawihai a, hun a tlem tawh avangin Real an chak ngei dawn niin a lang bawk. 

Hun pek belhah Real an inlar chhunzawm a, Modric chuan an goal hnihna a rawn khung ve leh - Sevilla tan chhanglet turin hunin a daih tawh lo a, 2-0 in Real Madrid an chak.

Real Madrid-in hnehna chang mahs se an beisei theih tawk chu season thara Cham­pions League khelh a ni a, nizana inkhel Barcelona chu he thu buatsaih a nih lai hian point sarihin an phak lo. 

Madrid khaw club-in Barca an thlauh dan leh Catalan club 'form' ngaihtuahin Real tan an elpui ber ni ṭhin team hi umphak beisei a har tawh a, match 20 an khelh tawhah vawi ruk ngawt an chak lo tawh. 

Real fan-te pawhin an team dinhmun an chiang a, Santiago Bernabeu-ah an team inkhel en tura kal an harsat - seat ruak hmuh tur a awm nual a, tun season-ah a vawi khatna a ni lo. 

Real tan champion beisei theih a nih tawh loh laiin an khaw club 'pui' Atletico tan erawh champion a la sawi rik ngam a, he an beiseina chhi nung tur hian hnehna an la chang ve zel bawk - Huesca chu 3-0 in an hneh. 

Huesca khelmuala inkhelah Atletico tan Lucas Hernandez chuan minute 31-na lekah goal hmahruai a khung a, second half-ah Santiago Arias leh Koke ten goal khat ve ve khung ve leh bawkin an chak chiang hle. 

Copa del Rey aṭanga tla hlim Atletico hian Spanish Cup an mangṭha tawh avangin La Liga leh Champions League chu an beisei a ni a, kalkawng erawh a awlsam lo ang - nizanah Barca-in hnehna an chan chuan point ngain an inthlau ang a, Champions League last 16-a an hmachhawn tur chu Juventus an ni bawk.