Man United khingpui tur PSG an hrang

Paris Saint Germain chuan Ligue 1-ah team dang chunga leng an ni tih nemngheh nan Guingamp chu Inrinni zan khan an mual Parc des Princes-ah 9-0 in an sawp a; Kylian Mbappe leh Edinson Cavani ten hattrick siamin Neymar-a'n goal hnih a khung a, Thomas Meunier-a'n goal khat a khung ve bawk.

Table mawngphaha awm Guingamp hian ni 12 liam ta khan French Cup semifinal-ah PSG hi 2-1 in an hneh a, amaherawhchu tun Inrinni an inkhelh nawn leh hi chuan an barakhaih nawn lo tih inkhelh ṭan phat aṭangin a hriat nghal. 

Season liam ta PSG chuan Dijon chu 8-0 in an sawp a, hei hi an muala an chak chian ber ṭum niin tun ṭumah hian hemi record hi an khum a. Inelna hrim hrima an khingpuite an la sawp ber ṭum erawh French Cup-ah Cote Chaude chu 1994 khan 10-0 in an sawp.

PSG hian match 19-ah point 53 hmuin anmahni aia match hniha khel tam Lille aiin point 13 in an sang fal zawk a, an champion nawn ngei dawn niin a lang. Chutihrualin France football-a roreltu nih hi sum tam tak hmangtu PSG duh ber a ni lo a, an hma thlir zinga pawimawh tak chu Champions League nomawi a ni.

French champion hian manager lailawk Ole Gunnar Solskjaer hnuaia la chak vek Manchester United chu UCL last 16-ah an hmachhawn dawn a, first leg hi February 12 zanah Old Trafford-ah khelh a ni ang.