Asian Cup last 16 - zanin a hmuhnawm dawn

Asia khawmualpuia ram leh ram football hmanga inelna lian ber Asian Cup last 16 chu nizan khan khelh ṭan a ni a, he thu buatsaih a nih lai hian nizan result kan hre hman lo. 

Zanin dar 7:30-a inkhel tur a hmuhnawm dawn a, group stage lama hmuhnawm tak Australia leh Uzbekistan an intawng ang - Australia hian match hmasa berah Jordan ngam lo mah se Palestine leh Syria hneh zawnin an insiamṭha. 

Australia tan Awer Mabil a ṭangkai leh dawn - Danish club FC Midtjylland forward hian goal hnih a khung tawh a, Celtic attacking midfielder Tom Rogic hi ngaihthah a thiang lo bawk ang.

Uzbekistan-in an match hnuhnung berah Japan ngam lo mah se goal khung kawngah harsatna an nei lo tih a hriat a, Australia-in hnehna chan an duh chuan Eldor Shomurodov ven uluk a fin thlak dawn.

Russian club Rostov for­ward hian match thum khelhah goal li a khung tawh a, group stage-a an match zawng zawngah goal a khung vek.

Vawiin tlai dar 4:30-a Japan leh Saudi Arabia inkhel tur hi sawi hmaih thiang lo a ni a, group stage an khelh dan aṭanga teh tur a nih erawh chuan Japan hi chak tura beisei an ni - match thumah hnehna an chang vek a, Saudi erawh Qatar lakah an tlawm thung.

Zanin dar 10:30-ah inel­na thlengtu UAE chuan Kyrgyzstan an hmachhawn dawn a, Kyrgyzstan hi vawi khat chiah chak chunga last 16 lut an nih laiin UAE erawh match thum an khelh tawhah tlawm an nei lo.