Chelsea hnehtu Arsenal

Arsenal chuan Premier League palian pali zinga tel turin theihna an la nei tawk a nih tih lantir nan Chelsea 2-0 in an hneh a, Unai Emery naute hian Champions League khelh an beiseina a chhawm nun thar rualin an chunga awm Blues dinhmun chu na takin an sawinghing nghal bawk.

League match 23 khelh tawh chinah Gunners-in point 44 an nei a, pangana dinhmun luahin Manchester United nen an point a inzat, an chunga awm Chelsea nen an inkarah point thum chauh a awm avangin nomawi inchuh boruak tluk zetin palina inchuh boruak a sang chho dawn.

Inrinni zan Emirates Stadium-ah Unai Emery-a'n season tir lama an hneh loh lakah hnehna chan let a tum a, an mikhual Chelsea lamin defender aṭanga na taka an rawn nawr ṭhin an dan theih nan forward bakah midfielder-te chu Blues player a nawr tawm tir.

Alexandre Lacazette-a'n defender Hector Bellerin hnen aṭanga ball harsa ve tak tura ngaih a dawn chu tawih zeta la thlain, Lyon striker hlui hian box chhunga Blues player hual vel kar chep zet aṭangin Chelsea goalkeeper Kepa Arrizabalaga dan hman lohin a khung - minute 14-na lekah awm lo a ata awmah a chantir.

Chawlhlawk hman hma deuhin Chelsea defender ten box chhungah Laurent Koscielny an ngaihthah a, France international hlui hian tlarhnunga a dinpui Sokratis Papastathopoulos-a ball pek chu tauh ṭhelh mah se a darin a su goal.

Season tawp ruala chhuak tur Aaron Ramsey chu match tam zawkah bench lama dah ni mah se Chelsea lakah bul ṭantir a ni. Welsh international hi khelmual laiah a thawkrim a, Chelsea chhuanvawr Jorginho hliahkhuhin Arsenal goal nawr kawnga bul tumtu pawimawh a ni deuh zel, minute 67-naa lak chhuah a nih thleng khan ani aia tlan hnem an awm lo.

Striker Lacazette, Pierre-Emerick Aubameyang leh Bellerin te inkawp an hmuhnawm a, Golbon international Auba hian holam takin ṭum hih a hlah. Arsenal tana thu lawmawm loh pakhat erawh Spain international Bellerin hi khup hliam vanga thlak a ngai.

Arsenal manager Emery chuan, "A tira kan hriat dan kha chuan Bellerin hliam hi a dinhmun a ṭha lo, endik a nih hunah a chawlh chen tur a hriat ang," a ti. Spanish manager hian hun tawp lam minute 20 chhunga an goal venhim theih dan chuan a tih lawm thu a sawi bawk.

Maurizio Sarri-a'n a striker neih lai Alvaro Morata leh Olivier Giroud te a rin zawh loh avangin tlarhma laiah Eden Hazard dah leh a ni a, an goal nawr a na tawk lo. Defender Marcos Alonso-a'n goal ban a tih per tih mai loh chu hun chanve hma lamah goal hlauhawm an nei thei lo.

Goal hnih an phurh hnuah pawh Sarri naute an tho chhuak thei lo, minute 82-na thlengin Arsenal goal zawna pet an nei miah lo! Match danga an hman thiam wing back Alonso an dan theih bakah Gunners tlarhnung lai na taka su tur striker an nei lo chu an tuar.

Chelsea manager Sarri chuan, "Ka lawm loin ka thimrim hle, huaisenna kan tlachham lutuk kha a lungngaih thlak lai chu a ni. Tottenham Hotspur lakah pawh rilru hnual tih hriat takin kan khel tawh, player ten phur leh thatho taka an khelh theihna tur fuih chu hna pawimawh a ni," tiin a sawi.

Inrinni zan Premier League inkhel dangah Manchester United chuan an mikhual Brighton & Hove Albion chu 2-1 in an hneh ve bawk a, manager lailawk Ole Gunnar Solskjaer chu United enkawl tawhtu zingah league match hmasa paruka hnehna chang vek thei awmchhun a ni.

Old Trafford-ah Paul Pogba chuan ama penalty hlawhchhuah a khung a, tun hnaia striker par vul mek Marcus Rashford chuan club tana match 150-na a khelh zanah solo goal a khung bawk - hun tawp dawn lama Brighton midfielder Pascal Gross goal khung chuan awmzia a nei phak tawh lo. 

Kum 45 mi Solskjaer chuan, "Enchhin kan ni a, kan theihna leh thiamna ang tak chuan kan khel chhuak lo nachungin a pawimawh ber point thum kan hmu. Nuam ti tak chunga ṭha taka khelh dan kan zir zel ang," tiin a sawi.