Quarterfinal-ah Nadal

Rafael Nadal chuan nimin khan Tomas Ber-dych hnehin Australian Open quarterfinal a lut a, semifinal lut tur January 22-ah chuan Frances Tiafoe a paltlang leh a ngai ang.

Rod Laver Arena-a inkhelah kum 32 mi Nadal hian Wimbledon finalist ni tawh hi 6-0, 6-1, 7-6 (7-4) in a sawp. Berdych hi tun hnaiah hliam vangin a inkhel tam lo a, seeded a ni phak lo - khel ṭha chho leh tawh viau mah se world number 2 lakah erawh a la khawng tawk lo hle.

Grand Slam vawi 17 champion tawh Nadal hian Open Era china major tournament palia vawi khat aia tam champion kim thei hmasa ber nih a tum mek a, Melbourne Park-ah hian 2009 ang bawka a champion leh thei a nih chuan sulhnu ropui a hnutchhiah dawn a ni.

Spanish tlangval Nadal chuan, "Hliam vanga kan chawlh reng hnua kan rawn kir hlim a nih chuan inkhelh a harsa ṭhin, tun ṭumah pawh khan Berdych dinhmun kha ka hriatthiam pui hle, match ṭhenkhat chu harsa ti taka a khelh a la ngaih rih ang," tiin a khingpui chungchang a sawi.

Hmeichhe singles lamah Maria Sharapova chu khawtual nula Ashleigh Barty lakah 4-6, 6-1, 6-4 in a chak lo. Seeded 15-na Barty hian hnehna chang turin game hnuhnung lam pakua a la zawn thei a, a vawi khat nan Grand Slam quarterfinal a khel dawn.

Barty hian a match lehpekah chuan Amanda Anisimova hnehtu Petra Kvitova a hmachhawn leh dawn. World number 6 Kvitova hian quarterfinal lut turin 6-2, 6-1 in hnehna a chang a, Grand Slam vawi hnih champion tawh Czech nula hian a vawi khat nan Melbourne-ah champion a tum.